اسلام آباد(مانیٹرنگ ڈیسک)سپریم کورٹ کھل گئی ، چیف جسٹس بھی اپنے ججز سمیت پہنچ گئے ، نجی ٹی وی جیو نیوز کے مطابق اپوزیشن اور پی ٹی آئی کے ارکان بھی سپریم کورٹ پہنچ رہے ہیں ، اسی دوران فواد چوہدری ، علی محمد اور بابر اعوان بھی سپریم کورٹ پہنچے اور

وی آئی پی گیٹ سے اندر جانے کی کوشش کی ، جس پر عملہ نے انہیں روک لیا اور کہا کہ آپ سائلین کے دروازے سے اندر جائیں ، دوسری جانب مسلم ن کے صدر اور قومی اسمبلی میں قائد حزب اختلاف میاں محمد شہباز شریف نے وزیر اعظم عمران خان کو آئین اور جمہوریت کا غدار قرار دے دیا۔میڈیا سے گفتگو کرتے ہوئے شہباز شریف نے کہا ہے کہ عمران نیازی اور حواریوں نے کھلی آئین شکنی کی، وہ سب آرٹیکل 6 کی پکڑ میں آگئے ہیں، ایوان میں ثابت ہوگیا کہ عمران نیازی ہار گئے ہیں۔قائد حزب اختلاف کا کہنا تھا کہ اس وقت ملک میں کوئی حکومت نہیں بلکہ آئین شکن ٹولے کا قبضہ ہے۔انہوں نے کہا کہ عمران نیازی وزیراعظم ہی نہیں تو اس آئینی اختیار کو استعمال کیسے کرسکتا ہے، آئین کی شق 5 کو استعمال کیا گیا ہے، اسی میں لکھا ہے ہر صورت آئین پر عمل کیا جائے گا۔انہوں نے کہاکہ شخصی اقتدار کو غیرآئینی طول دینے کے لئے آئین پر حملہ کیا گیا ہے، عمران نیازی ملک کو انارکی میں دھکیل چکے ہیں۔شہباز شریف نے کہا کہ چیف جسٹس پاکستان ملک کو بحران سے بچا سکتے ہیں، امید ہے کہ عدالت عظمیٰ آئین کی بالادستی کو یقینی بنائے گی، ملک کو آئین شکنی سے تحفظ کیلئے اپنا آئینی فرض پورا کریں گے۔