لاہور( این این آئی)حکومت کی جانب سے جہانگیر ترین گروپ کومنانے کیلئے کاوشیں جاری ہیں۔وزیر تعلیم ڈاکٹر مراد راس نے ترین گروپ کے رہنمائوں ملک نعمان لنگڑیال اور عبد الحی دستی سے ملاقات کی ۔حکومت کی جانب سے ترین گروپ کو مائنس عثمان بزدار سے دستبردار کرانے کے لئے بات چیت کی گئی۔ ڈاکٹر مراد راس نے کہا ہے کہ ترین گروپ کے تحفظات، بیورو کریسی اور پولیس کے خلاف شکایات پر عملدرآمد کا جائزہ لیا گیا ہے جبکہ ترین گروپ کو تمام ترقیاتی منصوبوں کے لئے فوری فنڈز فراہم کرنے کی یقین دہانی بھی کرائی گئی ہے ۔ انہوں نے کہا کہ ملاقات کے دوران وزیر دفاع پرویز خٹک سے بھی رابطہ کیا گیا ۔ترین گروپ کے اراکین نے پرویز خٹک کو وفاقی محکموں سے متعلقہ تحفظات سے بھی آگاہ کیا ۔ انہوں نے کہا کہ ترین گروپ اور حکومتی ٹیم کے درمیان اڑتالیس گھنٹوں میںایک او رملاقات کا فیصلہ ہوا ہے ۔