کراچی (این این آئی) فروری کے چوتھے ہفتے میں بیشتر اشیا کی قیمتوں میں اضافہ، ہفتہ وار مہنگائی کی شرح 0.51 فیصد بڑھ گئی۔ملک میں مہنگائی کی مجموعی شرح 15 اعشاریہ 90 فیصد کی سطح پر آگئی، ادارہ شماریات نے مہنگائی کی ہفتہ وار رپورٹ جاری کردی،

ایک ہفتے کے دوران 20 اشیا ضروریہ کی قیمتوں میں اضافہ ریکارڈ کیا گیا ہے۔رپورٹ کے مطابق برائلر مرغی کی فی کلو قیمت 31 روپے 97 پیسے مہنگی ہو گئی، برائلر مرغی کی فی کلو قیمت 253 روپے کی سطح پر پہنچ گئی، ٹماٹروں کی فی کلو قیمت میں 4 روپے 83 پیسے کا اضافہ ہوا، مسٹرڈ آئل کی فی کلو قیمت 11 روپے 92 پیسے بڑھ گئی۔رپورٹ میں بتایا گیا ہے کہ رواں ہفتے گھی کا ڈھائی کلو ٹن 5 روپے 38 پیسے مہنگا ہوا، 20 کلو آٹے کا تھیلا ایک روپے 21 پیسے مہنگا ہوا، مٹن ،تازہ دودھ،دہی اور چاول بھی مہنگے ہوئے۔ادارہ شماریات کے مطابق ایک ہفتے کے دوران 11 اشیا ضروریہ کی قیمتوں میں کمی ہوئی، لہسن کی فی کلو 21 روپے52 پیسے سستا ہوا، انڈوں کی فی درجن قیمت میں 3 روپے 98 پیسے کی کمی ہوئی، پیاز، آلو، گڑ، دال ماش اور دال مسور کی قیمتوں میں بھی معمولی کمی ہوئی جبکہ بریڈ، بچوں کے دودھ سمیت 20 اشیا کی قیمتوں میں استحکام رہا۔