کیف(آن لائن ) یوکرین میں کمسن بیٹی کی باپ سے جدائی: جذباتی لمحات دلوں کو رنجیدہ کر گئے ۔میڈیارپورٹس کے مطابق یہ واقعہ جنگ زدہ ملک کے دارالحکومت کیف میں پیش آ یا ہے کہ جہاں ایک باپ اپنی کمسن بیٹی کو اہلیہ کے ہمراہ الوداع کہتے ہوئے پھوٹ پھوٹ کر رویا ہے۔

باپ بیٹی کی جدائی کے جذباتی لمحات پر مبنی ویڈیو سوشل میڈیا پر وائرل ہوئی ہے اور لوگوں کی آنکھوں سے آنسو نکل پڑے ہیں۔وائرل ہونے والی ویڈیو کے متعلق کہا گیا ہے کہ ایک فوجی جب اپنی کمسن بیٹی کو خود سے جدا کرنے لگا تو اپنے آپ پر قابو نہیں رکھ سکا اور علیحدگی کا سوچ کر پھوٹ پھوٹ کر رو دیا۔اس حوالے سے بتایا جارہا ہے کہ کیف میں موجود فوجی اہلیہ اور بچی کو بس کے ذریعے کسی محفوط جگہ مقام پر بھیج رہا ہے لیکن اپنے فرائض کی ادائیگی کی وجہ سے خود ان کے ہمراہ نہیں جا رہا ہے اور شاید یہ بھی نہیں جانتا کہ اب کب، کہاں اور کن حالات میں ملاقات ہوگی؟ اس لیے بیٹی سے لپٹ کر پیار کرتے ہوئے پھوٹ پھوٹ کر رو رہا ہے۔ سماجی رابطوں کی ویب سائٹ پر صارفین باپ بیٹی کے پیار اور جدائی کے لمحات کی ویڈیو دیکھ کر انتہائی غمزدہ ہوئے ہیں اور اپنے جذبات و خیالات کا اظہار کر رہے ہیں۔ عالمی ذرائع ابلاغ کے مطابق اب تک یوکرین کے دارالحکومت کیف پر روسی حملے میں فوجیوں سمیت 100 سے زائد افراد ہلاک ہوچکے ہیں۔