مکوآنہ (این این آئی )برٹش کونسل کی طرف سے انٹرنیشنل سکول ایوارڈ کیلئے سرکاری سکولز کو سال بھر میں مختلف سرگرمیاں کرکے انہیں دیگر ممالک کے سکولز سے شیئر کرنا تھا جس پر فیصل آباد کے دس سرکاری سکولز نے انٹرنیشنل سکول ایوارڈ اپنے نام کرلیا۔

قائداعظم اکیڈمی فار ایجوکیشنل ڈویلپمنٹ فیصل آباد میں انٹرنیشنل سکول ایوارڈ جیتنے والے سکولز کے اعزاز میں تقریب منعقد کی گئی جس میں پرنسپل قائد اکیڈمی ڈاکٹر نجمہ کوثر، ریجنل پروگرام مینجر ڈاکٹر ظفر اقبال، قائد اکیڈمی پنجاب سے اقصی ریحان نے سکولز میں آئی ایس اے ایوارڈز تقسیم کئے۔ گورنمنٹ گرلز ہائر سیکنڈری سکول علامہ اقبال کالونی، ایم سی گرلز ہائی سکول سوساں روڈ، ایم سی گرلز ہائی سکول پیپلز کالونی، ایم سی گرلز ہائر سیکنڈری سکول ڈجکوٹ روڈ، گورنمنٹ اسلامیہ ہائی سکول 245 ر۔ب عباس پور، گورنمنٹ گرلز ہائر سیکنڈری سکول راجہ غضنفر کالونی نے انٹرنیشنل سکول ایوارڈ حاصل کیا۔ آئی ایس اے ایوارڈ حاصل کرنے والوں میں گرلز ایلیمنٹری سکول 83 گ۔ب، گرلز پرائمری سکول سنٹرل جیل، لیبارٹری ہائر سیکنڈری سکول قائد اکیڈمی اور گورنمنٹ گرلز ہائی سکول 224 ر۔ب بھی شامل تھے۔ تقریب میں آئی ایس اے ایمبیسیڈر نوید افضل اور میمونہ انور نے بھی شرکت کی اور ایسی سرگرمیوں کے بعد سرکاری سکولز میں معیار تعلیم بہتر ہونے کی نوید سنائی۔