اسلام آباد (آن لائن)دفتر خارجہ نے کہا ہے کہ یوکرین میں موجود تمام پاکستانیوں کو ایمرجنسی رابطہ نمبر جاری کردیا گیا ہے۔ ترجمان دفترخارجہ کا کہنا ہے کہ یوکرین میں تمام پاکستانیوں کے لیے سفارتخانہ 24 گھنٹے خدمات انجام دے رہا ہے۔ یوکرین میں موجود پاکستانی شہری ایمرجنسی نمبر 00380638282984 اور پاکستانی سفارتخانے کے ای میل [email protected] پر رابطہ کرسکتے ہیں۔

ترجمان دفتر خارجہ کا کہنا ہے کہ یوکرین میں موجود تمام پاکستانی ایمرجنسی نمبر اور ای میل پر رابطہ کرسکتے ہیں۔واضح رہے کہ روسی فوج کے یوکرین پر حملے اور یوکرینی دارالحکومت کیف کے ایئرپورٹ پر بم دھماکے کے بعد وہاں ہنگامی صورت حال ہے، لوگوں نے شہر خالی کرنا شروع کر دیا۔پاکستانیوں کی بھی بڑی تعداد یوکرین کے دارالحکومت میں پھنس گئی ہے۔ واضح رہے کہ یوکرین کی جانب سے جوابی کارروائی میں 5 روسی طیارے اورایک ہیلی کاپٹرتباہ کردیا گیا۔جبکہ یوکرائن کے صدرنے ملک بھر میں مارشل لا نافذ کردیا ہے۔غیر ملکی خبررساں اداروں کی رپورٹس کے مطابق انہوں نے ٹیلی ویژن پر ایک حیران کن بیان میں کہا کہ میں نے فوجی آپریشن کا فیصلہ کر لیا ہے۔ولادیمیر پیوٹن نے دوسرے ممالک کو خبردار کیا کہ روس کی کارروائی میں مداخلت کی کوئی بھی کوشش ایسے نتائج کا باعث بنے گی جو انہوں نے کبھی نہیں دیکھے ہوں گے۔انہوں نے امریکا اور اس کے اتحادیوں پر الزام لگایا کہ وہ یوکرین کو نیٹو میں شمولیت سے روکنے کے لیے روس کے مطالبات کو نظر انداز کر رہے ہیں اور ماسکو کو سیکیورٹی کی ضمانتیں پیش کر رہے ہیں۔انہوں نے کہا کہ روس کے اس فوجی آپریشن کا مقصد یوکرین کی ڈی ملٹرائزیشن کو یقینی بنانا ہے، ہتھیار ڈالنے والے تمام یوکرینی فوجی جنگی زون سے بحفاظت نکل سکیں گے۔

دھماکوں نے مشرقی یوکرینی شہر ڈونیٹسک کو بھی ہلا کر رکھ دیا جس کے بعد سویلین طیاروں کو خبردار کردیا گیا۔دارالحکومت کے مرکزی ہوائی اڈے کے قریب گولیوں کی آوازیں سنائی دیں تاہم روس کی فوجی کارروائی کا دائرہ کار فوری طور پر واضح نہیں ہو سکا۔صحافیوں نے بحیرہ اسود کے بندرگاہی شہر اوڈیسا میں بھی دھماکوں کی آواز سنی۔روسی سرحد سے 35 کلومیٹر جنوب میں واقع ایک بڑے شہر خارکیف میں بھی دھماکے سنے گئے۔