لاہور( مانیٹرنگ ڈیسک ، این این آئی)سابق وزیر اعظم نواز شریف کی واپسی سے متعلق پاکستان مسلم لیگ (ن) برطانیہ چیپٹر کے سینئر نائب صدر ناصر محمود بٹ کا ایک ٹوئٹ وائرل ہے۔ناصر بٹ محمود کی جانب سے کی گئی ایک ٹوئٹ میں علاج کی غرض سے بیرون ملک
لندن میں موجود میاں محمد نواز شریف کے وطن واپس آنے کی تیاریوں سے متعلق بتایا گیا ہے۔ناصر بٹ محمود کا میاں محمد نواز شریف کی ایک تصویر شیئر کرتے ہوئے لکھنا ہے کہ قائد نوازشریف آج لندن آفس میں۔۔۔۔۔ پاکستان آنے کی تیاریاں انشااللہ، انشااللہ، انشااللہ۔دوسری جانب وفاقی حکومت نے مسلم لیگ (ن) کے قائد نواز شریف کی وطن واپسی کے سلسلہ میں پنجاب حکومت سے میڈیکل رپورٹس پر ماہرین کی رائے سے آگاہ کرنے کیلئے خط لکھ دیا ۔ نجی ٹی وی کے مطابق وفاقی کابینہ کے فیصلے کی روشنی میں پنجاب حکومت کو خط ارسال کیا گیا ہے ۔اٹارنی جنرل آفس کی جانب سے پنجاب حکومت کو لکھے گئے خط کے متن میں کہا گیا ہے کہ نوازشریف کی جانب سے لندن میں علاج معالجے کے حوالے سے لاہور ہائیکورٹ میں جمع کرائی گئی میڈیکل رپورٹس پر ماہرین سے رائے لی جائے۔ ذرائع کے مطابق رائے ملنے پر نواز شریف کی واپسی سے متعلق لائحہ عمل اپنایا جائے گا۔ ذرائع کے مطابق ماہرین نے اگر نواز شریف ک ی صحت کو بہتر قرار دیا تو ان کے معالج سے رابطہ کیا جائے گا۔ پنجاب حکومت کی جانب سے ہائیکورٹ میں جمع کرائی گئی رپورٹس پر ماہرین سے رائے لینے کے بعد وفاق کو آگاہ کیا جائے گا۔
