لاہور( مانیٹرنگ ڈیسک /این این آئی)پنجاب حکومت نے یکم جنوری سے 3کروڑ 11لاکھ خاندانوں کیلئے نیا پاکستان صحت کارڈ کی سہولت لانچ کر دی ، صحت کارڈ کے ذریعے سرکار و نجی تمام ہسپتالوں سے علاج کروایا جا سکے گا ۔ صحت کارڈ کے حامل افراد 10لاکھ روپے تک کا سرکاری ونجی ہسپتال سے علاج بالکل مفت کروا سکیں گے ۔ صحت کارڈ کے ذریعے مندرجہ ذیل بیماریوں کا

مفت علاج ہوسکے گا۔یہ کارڈ دل کے امراض، ذیابیطس سے متعلق پیچیدگیوں کا علاج، حادثے کا شکار ہونیوالے افراد کا علاج اور سڑک حادثات سے متاثر ہونیوالوں کا علان، دل، جگر، گردوں اور پھیپھڑوں کا علاج، کالا یرقان، کینسر ٹریٹمنٹ، اعصابی نظام کی جراحی (سرجری)اور گردوں کی بیماری کا علاج، کڈٹی ٹرانسپلانٹ کیلئے استعمال کیا جا سکے گا ۔ دوسری جانب صوبائی وزیر صحت ڈاکٹر یاسمین راشد نے کہا ہے کہ اس سال محکمہ صحت 25 ہزار نئی ملازمتوں کا اعلان کرے گا، بہت جلد پاکستان بھی پولیو فری ممالک میں شامل ہوگا،صحت کارڈ اس شخص کو ملے گا جس کے پاس شناختی کارڈ ہوگا، اگر کسی کا شناختی کارڈ نہیں بنا تو وہ لازمی بنوالے۔ پریس کانفرنس کرتے ہوئے انہوں نے کہا کہ جس کے بچے ہیں وہ اپنے بچوں کا ب فارم ضرور بنوائے جو نادرا کی لسٹ میں نہیں ہوگا اسے اس کارڈ سے فائدہ نہیں ہوگا۔انہوں نے کہا کہ اس تمام سہولت کے لیے ہم نے ایپ بھی بنائی ہے، ایپ کا نام نیا پاکستان قومی صحت کارڈ ہے، ایپ کے ذریعے تمام معلومات مل سکیں گی۔انہوں نے کہا کہ ہیلتھ کارڈ امیر و غریب ہر شہری کے لیے ضروری ہے، لاہور میں 133 ہسپتالوں کو صحت کارڈ لسٹ میں شامل کیا ہے۔ وہ لوگ فائدہ اٹھا رہے ہیں جنہوں نے پرائیوٹ ہسپتال جانے کا بھی نہیں سوچا۔انہوں نے کہا کہ ویب سائٹ پر کارڈ بنانے کا طریقہ کار بھی دیا ہوا ہے، مریض کے داخل ہونے کے بعد صحت کارڈ کی سہولت ہوگی، کارڈ گھر کے سربراہ کو ملے گا ہر شخص کو نہیں ملے گا۔انہوںنے کہا کہ ہر ضلع میں صحت کارڈ کے لیے ایک خصوصی ڈیسک قائم کیا ہے، بیوی بچوں کی رجسٹری کروانا لازمی ہے، ہیلپ لائن نمبر سے بھی معلومات حاصل کی جاسکتی ہیں۔انہوں نے مزید کہا کہ اس سال محکمہ صحت 25 ہزار نئی ملازمتوں کا اعلان کرے گا، گزشتہ سال پولیو کا کوئی کیس سامنے نہیں آیا، بہت جلد پاکستان بھی پولیو فری ممالک میں شامل ہوجائے گا۔