اسلام آباد (این این آئی)وفاقی وزیر اقتصادی امور عمر ایوب خان نے تصدیق کی ہے کہ توانائی کے شعبے میں اصلاحات کے لئے ایشیائی ترقیاتی بینک کی جانب سے پاکستان کو 30 کروڑ ڈالر موصول ہوگئے ہیں ۔اپنے بیان میں وفاقی وزیر اقتصادی امور عمرایوب خان نے کہا کہ
پاکستان کو توانائی کے شعبہ میں اصلاحات کے لئے ایشیائی ترقیاتی بینک کی جانب سے 30 کروڑ ڈالر کی معاونت موصول ہو گئی ہے،اس سے نہ صرف پاکستان کے زرمبادلہ کے ذخائر مضبوط ہو ں گے بلکہ ایکسچینج ریٹ کو مستحکم رکھنے میں بھی مدد ملے گی۔ وفاقی وزیر نے کہا کہ توانائی کے شعبہ میں اصلاحات کے پروگرام کے لئے معاونت کی منظوری اس پروگرام اور اس کے نفاذ کے ضمن میں بین الااقوامی مالیاتی اداروں کی جانب سے پاکستان کی حکومت پر اعتماد کا مظہر ہے۔ وفاقی وزیر نے کہا کہ پاکستان کی حکومت معیشت ، توانائی ، کیپٹل مارکیٹس ،محصولات اور اسلوب حکمرانی میں بہتری کے لئے اصلاحات کے پروگرام کو آگے بڑھانے میں پر عزم ہے۔ انہوں نے کہا کہ اس پروگرام سے گردشی قرضوں کے حجم پر قابو پانے ، اسلوب حکمرانی اور توانائی کے شعبہ میں بنیادی ڈھانچہ کو بہتر بنانے میں مدد ملے ۔
