کراچی(این این آئی)شہر قائد کے علاقے محمود آباد کے نالے میں گیس بھرنے سے دھماکا ہوا ہے، دھماکے کے نتیجے میں 3 افراد زخمی ہوگئے ہیں۔ابتدائی اطلاعات کے مطابق دھماکا نالے میں گیس بھرنے کے باعث ہوا، دھماکے کے باعث کئی دکانیں تباہ ہوگئیں ہیں۔

دھماکے سے زخمیوں کی شناخت، بلال، دلاور اور جون کے نام سے ہوئی ہے، جنہیں طبی امداد کے لئے جناح اسپتال منتقل کردیا گیا ہے۔ایس ایس پی ایسٹ قمرجسکانی نے میڈیا سے گفتگو میں بتایا کہ گیس لائن اور نالے کی گیس نے ملکر پریشر بنایا جس کے نتیجے میں دھماکا ہوا،دھماکے کے نتیجے میں قریبی سڑک کی دوسری جانب دکان موجود تھی جو متاثر ہوئی ہے۔قمر جسکانی کے مطابق دھماکا معمولی نوعیت کا ہے، پولیس نفری دھماکے کی جگہ پر پہنچ گئی ہے۔انہوں نے بتایاکہ دھماکے کی زد میں آنے والے تینوں افراد بھی معمولی زخمی ہوئے جنہیں طبی امداد کے بعد گھر بھیج دیا گیا ہے۔دوسری جانب انچارج سی ٹی ڈی مظہر مشوانی بھی واقعے کی جگہ پہنچ گئے ۔انہوں نے کہا کہ ابتدائی طور پر دھماکا نالے میں گیس بھر جانے سے ہوا ہے۔انہوں نے بتایاکہ واقعے میں بچے سمیت تین افراد معمولی زخمی ہوئے ہیں، دکاندار کا بیان بھی لیا گیا ہے۔