فیصل آباد(این این آئی)محکمہ صحت کے عملہ کی جانب سے کورونا ویکسی نیشن کے ریکارڈ میں بوگس اورجعلی انٹریاں کرنے کا انکشاف‘ڈائریکٹر ہیلتھ سروسز پنجاب نے صوبہ بھر کی ڈسٹرکٹ ہیلتھ اتھارٹیز کے سربراہان سے رپورٹ طلب کر لی۔ڈی ایچ ایس پنجاب کی طرف سے جاری ہونے والے مراسلہ میں صوبہ بھر کی ڈسٹرکٹ ہیلتھ اتھارٹیز کے سی ای اوز کو کہاگیا ہے کہ صوبہ بھر میں

شہریوں کو کورونا کی پہلی اوردوسری خوراک لگوانے جس کے ٹارگٹ پورے نہ ہونے پر محکمہ صحت کے عملہ کی طرف سے نیشنل ایمونائزیشن مینجمنٹ سسٹم (NIMS)میں بوگس اورجعلی انٹریاں کرنا پائی گئی ہیں تاکہ حکومت کی طرف سے جاری ہونے والے ٹارگٹ کو مکمل دکھانے کیلئے کاغذی کارروائیاں کی جا رہی ہیں اورمشاہدہ میں آیا کہ عملہ کی طرف سے محکمانہ کوڈدیگر افراد کو فراہم کئے گئے ہیں جو کہ این آئی ایم ایس میں اندراج کررہے ہیں جس کی وجہ سے حکومت کی کارروائی پرسوالیہ نشان اٹھ رہے ہیں جس پر انہوں نے ڈسٹرکٹ منیجرز ‘سی ای او ہیلتھ ڈسٹرکٹ ہیلتھ آفیسرز‘ڈپٹی ڈسٹرکٹ ہیلتھ آفیسرز کو جانچ پڑتال کریں کہ عملہ کا ویکسی نیشن سٹاف کو بوگس اور جعلی انٹریز کرنے سے منع کریں تاہم اگرکسی بھی اضلاع میں کورونا ویکسین کی بوگس انٹریز کی اطلاعات موصول ہوئیں تو اس کے سربراہان کے خلاف کارروائی عمل میں لائی جائے گی۔