اسلام آباد(این این آئی)ہائی کورٹ نے وزیراعظم کے خلاف نااہلی کی درخواست پیٹشنر کی جانب سے واپس لینے کی بنیاد پر خارج کردی ۔منگل کو وزیراعظم عمران خان کے خلاف نااہلی کی درخواست اسلام آباد ہائی کورٹ نے درخواست گزار کی جانب سے واپس لینے کی بنیاد پر
خارج کردی۔ اسلام آباد ہائی کورٹ کے چیف جسٹس اطہر من اللہ اور جسٹس ارباب محمد طاہر نے کیس کی سماعت کی اس دوران وکیل درخواست گزار نے کہا کہ درخواست واپس لینا چاہتے ہیں جس پر عدالت نے ریمارکس دیے کہ اچھا ہے جا کر میدان میں لڑیں۔پٹیشنر عبدالوہاب بلوچ نے عمران خان کی نااہلی کے لیے عدالت سے رجوع کرتے ہوئے درخواست میں کہا تھا کہ عمران خان نے کاغذات نامزدگی میں اپنی بیٹی ٹیریان جیڈ وائٹ کو چھپایا لہذا اب وہ صادق و امین نہیں رہے، عمران خان کو صادق اور امین نہ ہونے کے باعث نااہل قرار دیا جائے۔واضح رہے کہ پٹیشنر گزشتہ عام انتخابات میں پاکستان جسٹس اینڈ ڈیموکریٹک پارٹی کے امیدوار برائے قومی اسمبلی تھے، پٹیشنر نے بعد ازاں پی ٹی آئی جوائن کر کے پٹیشن واپس لینے کی متفرق درخواست دائر کر دی تھی۔
