اسلام آباد (سپیشل رپورٹر) ترکی کی خاتون اول اور ترک صدر کی اہلیہ مسز ایمن اردوان نے ہفتے کے روز نور خان ایئربیس چکلالہ میں اپنے مختصر قیام کے دروان اپنی پاکستانی ہم منصب خاتون اول کلثوم نواز اور ان کی صاحبزادی محترمہ مریم نواز شریف کے ساتھ باہمی دلچسپی اور خانگی امور کے بارے میں بڑے دوستانہ ماحول میں تبادلہ خیال کیا۔ یہ دلچسپ اتفاق تھا کہ تینوں خواتین نے اپنے سر ڈھانپ رکھے تھے جس میں وہ بہت بھلی لگ رہی تھیں یہ امر قابل تذکرہ ہے کہ مسز کلثوم نواز اور میز ایمن اردوان کے درمیان پرانی دوستی ہے جس میں سفارتی رکھ رکھاﺅ اور پروٹوکول کو زیادہ اہمیت حاصل نہیں ہوتی وہ باہم بے تکلفانہ گفتگو میں مصروف ہیں اس دوران دونوں رہنما ترکی کے صدر رجب طیب اردوان اور وزیر اعظم نواز شریف کے درمیان الگ بات چیت جاری رہی جس میں دو طرفہ اہمیت کے امور پر بڑی گہرائی سے تبادلہ خیال ہوا۔ قابل اعتماد سفارتی ذرائع نے بتایا ہے کہ محترمہ مریم نواز شریف نے ترک صدر اور ان کی اہلیہ کے قیام کے ایک سو منٹ کے دوران خاتون مہمانداری کے طور پر کردار ادا کیا۔ ترکی کی خاتون اول نے اپنی میزبان دونوں خواتین سے ان کے اہل خانہ کی فرداً فرداً خیریت بھی دریافت کی اسی طرح مسز کلثوم نواز اور محترمہ مریم نواز نے ترک صدر کی اہلیہ سے ان کے خاندان کے افراد کی خیریت معلوم کی۔