لاہور(این این آئی)پاکستان ریلویز نے لاہور اور اسلام آباد میں مختلف سیاسی و مذہبی تنظیموں کے دھرنے کے شرکا کو روکنے کیلئے صرف فیملیز کو ٹکٹس جاری کرنے کی ہدایت دے دی۔ریلوے کی جانب سے جاری نوٹی فکیشن کے مطابق کسی بھی فردِ واحد کو سفر کا ٹکٹ جاری نہیں ہوسکے گا۔چیئرمین ریلوے حبیب الرحمٰن گیلانی نے لاہور، راولپنڈی اور پشاور ڈویڑن کے تینوں ڈویڑنل سپرنٹنڈنٹس کو نوٹی فکیشن جاری کردیا۔چیئرمین نے نوٹی فکیشن میں واضح ہدایت کی کہ راولپنڈی سیکشن پر سفر کسی بھی ٹرین یا کلاس میں فردِ واحد کو ٹکٹ جاری نہ کیا جائے۔انہوں نے کہا کہ موجودہ حالات کے پیش نظر صرف فیملی کو ہی سفری ٹکٹ جاری کرنے کا فیصلہ کیا گیا۔اس حوالے سے ریلوے کے شعبہ آئی ٹی ڈیپارٹمنٹ کو ہدایت کی گئی کہ سسٹم میں ای ٹکٹ صرف فیملیز کو ہی جاری ہوگا۔

موضوعات:پاکستان ریلوے