راولپنڈی /شمالی وزیرستان (این این آئی)شمالی وزیرستان میں سیکورٹی فورسز کے آپریشن میں ایک دہشت گرد مارا گیا۔پاک فوج کے شعبہ تعلقات عامہ (آئی ایس پی آر) کے مطابق سیکورٹی فورسز نے شمالی وزیرستان کے علاقے میران شاہ میں دہشت گردوں کی موجودگی کی اطلاع پر آپریشن کیا، فائرنگ کے شدید تبا دلے میں ایک دہشت گرد مارا گیا۔آئی ایس پی آر کے مطابق مارے گئے دہشت گرد کے قبضے سے اسلحہ اور ایمونیشن برآمد ہوئی جبکہ سیکورٹی فورسز نے علاقے کو گھیرے میں لے کر سرچ آپریشن شروع کردیا ہے۔آئی ایس پی آرکے مطابق دہشت گردوں کے ساتھ فائرنگ کے شدید تبادلے میں نائیک خلیل اور سپاہی شاکر اللہ بھی شہید ہوئے۔آئی ایس پی آر کے مطابق 34 سالہ شہید نائیک خلیل کا تعلق کوہاٹ سے ہے جبکہ 21 سالہ سپاہی شاکر اللہ شہید کا تعلق لکی مروت سے ہے۔