کراچی (این این آئی) سبزی منڈی چوکی پولیس نے میرے معذور بیٹے کو ناجائز گرفتارکرکے ایف آئی آر کاٹ دی، غریب اور بیوہ ہوں کوئی اور سہارا بھی نہیں ہے،حکام نوٹس لیں۔
یہ باتیں زہرانامی خاتون نے اعلیٰ حکام سے فریاد کرتے ہوئے کہی۔انہوں نے بتایاکہ میرابیٹاحبیب اللہ ولد غلام حیدر ایک ٹانگ سے معذور ہے اور سبزی منڈی میں محنت مزدوری کرکے گھر کا گزربسر چلاتاتھا،گھر بھی کرائے کا ہے ،سبزی منڈی پولیس نے میرے بیٹے کو اٹھاکرناجائز اسلحے کے کیس میں بندکردیا،جوسراسر جھوٹ ہے،میرابیٹا معذور ہے جو صحیح چل پھر بھی نہیں سکتااسلحہ کیسے چلائے گا۔زہرابی بی نے کہاکہ پولیس کے اعلیٰ افسران فوری طورپر نوٹس لیں اور شفاف تحقیقات کرکے میرے بے گناہ بیٹے کو رہاکروائیں۔انہوں نے التجاکی کہ مجھ غریب بیوہ پر ترس کھایاجائے اور میرے بیٹے کو رہاکرکے میرے دنیامیں واحد سہارے کو مجھے واپس دلوایاجائے۔
