لاہور (آن لائن)پاکستان مسلم لیگ (ن) نے ملک میں بدترین مہنگائی کے خلاف تحریک چلانے کا فیصلہ کیا ہے۔ ذرائع کے مطابق صدر پاکستان مسلم لیگ (ن) شہباز شریف
اورسربراہ پی ڈی ایم مولانا فضل الرحمان نے درمیان ٹیلی فون پر رابطہ ہوا ہے جس میں ملک کی موجودہ صورتحال بالخصوص مہنگائی میں ہوشربا اضافے کے حوالے سے تبادلہ خیال کیا گیا اور مہنگائی کے خلاف تحریک چلانے کا فیصلہ کیا ہے۔ ذرائع کے مطابق پاکستان مسلم لیگ (ن) کے قائد محمد نوازشریف سے بھی پارٹی صدر اور قائد حزب اختلاف شہباز شریف نے ٹیلی فون پر مشاورت کی ہے۔ مسلم لیگ (ن) کے قائد نواز شریف نے ملک میں بدترین مہنگائی کے خلاف بھرپور تحریک چلانے کے فیصلے کی توثیق کردی ہے۔قائدین نے ملک کی دیگر اپوزیشن جماعتوں کے ساتھ مل کر حکومت کے خلاف احتجاجی تحریک چلانے پر اتفاق کیا ہے ۔ رہنماؤں نے اتفاق کیا ہے کہ قوم کو مہنگائی، بے روزگاری اور معاشی تباہی سے نجات دلانے کے لئے گھروں سے نکلنا ہوگا۔ملک بھر میں احتجاج، احتجاجی ریلیاں اور مارچ ہوں گے۔
