قاہرہ(نیوزڈیسک) سعودی عرب اور مصر نے ایک کثیر جہتی معاہدے پر دستخط کیے ہیں جس کے تحت دونوں ممالک کے درمیان دفاعی اور معاشی تعاون بڑھایا جائے گا اور اسے مزید توسیع دے کر مشترکہ عرب دفاعی فورس قائم کرنے میں مدد ملے گی۔قاہرہ میں مصری صدرعبدالفتاح السیسی اور سعودی عرب کے وزیر دفاع محمد بن سلمان کے درمیان طویل مذاکرات کے بعد ’معاہدہ قاہرہ‘ منظرِعام پرآیا ہے جس کے تحت دونوں ممالک مشترکہ عرب افواج کے لیے کوشش کریں گے۔ ملاقات کے بعد جاری ایک مشترکہ بیان کے تحت عرب ممالک وزرائے خارجہ اور وزرائے دفاع اس سال 27 اگست کو قاہرہ میں ہونے والے ایک غیرمعمولی اجلاس میں شرکت کریں گے جس میں عرب مشترکہ فورس کے لیے ابتدائی گفتگو کی جائے گی۔مصر کے صدارتی آفس سے جاری بیان میں کہا گیا ہے کہ دونوں جانب سے خطے میں استحکام اور سیکیورٹی کے لیے تمام تراقدامات کرنے پر زور دیا گیا اور عرب ممالک کے تحفظ کے لیے مشترکہ طور پر کام کرنے پراتفاق ہوا ہے، “قاہرہ اعلامیہ” کے تحت ٹرانسپورٹ اور توانائی میں بھی تعاون بڑھایا جائے گا۔ اجلاس میں دونوں ممالک نے شام اور عراق میں سرگرم داعش سے نمٹنے کا عزم بھی ظاہرکیا۔