اسلام آباد /مکہ مکرمہ(نیوزڈیسک)معروف ہالی ووڈ اداکارہ اور اقوام متحدہ کی ایجنسی برائے مہاجرین کی خصوصی سفیر انجلینا جولی چار روزہ دورے پر میانمار پہنچ گئیں، اس موقع پر بدترین مظالم کا شکار روہنگیا مسلمانوں نے دورے کا خیرمقدم کرتے ہوئے ان سے مسلم اکثریتی علاقے اراکان آمد کو بھی اپنے ایجنڈے میں شامل کرنے کی اپیل کی ہے۔ ڈائریکٹر جنرل اراکان روہنگیا یونین ڈاکٹر وقار الدین اور صدر گلوبل روہنگیا سینٹر شیخ عبداللہ معروف نے جمعرات کو اپنے مشترکہ بیان میں کہا کہ انجلینا جولی کے دورہ ءبرما سے ملکی صورتحال پر مثبت نتائج مرتب ہوں گے، ان کا کہنا تھا کہ رواں برس نومبر میں ہونے والے قومی انتخابات کے تناظر میں انجلینا جولی کا مختلف مکاتب فکر سے گفت و شنید کی خواہش ظاہر کرناخوش آئند ہے، انجلینا کا یہ اقدام برما میں انسانی المیہ کے خاتمے کیلئے نہایت اہمیت کا حامل ثابت ہوگا۔اراکان روہنگیا یونین اور گلوبل روہنگیا سینٹر کے مطابق دو سالہ مدت کے لیے عارضی گرین کارڈ کا اجرا ءدراصل صدیوں سے اراکان میں بسنے والے مسلمانوں کو بنگالی النسل قرار دے کر ملک بدر کرنے کی سازش ہے، مشترکہ اعلامیہ میں دونوں رہنماو ¿ں کا موقف تھا کہ مختلف آئی ڈی پیز کیمپس میں پناہ گزین ، امن کی تلاش میں دربدر بھٹکتے اور سمندروں کی خونخوار لہروں سے نبرد آزما روہنگیا مسلمانوں کو درپیش مسائل کی بنیادی وجہ حق شہریت سے محرومی ہے، انہوں نے گرین کارڈ اسکیم کو یکسر مسترد کرتے انجلینا جولی سے اپیل کی ہے کہ وہ روہنگیا مسلمانوں کے حقوق کی بحالی اور انہیں قومی دھارے میں شامل کر نے کے لئے برمی حکومت پر دباو ڈالیں۔