لاہور(این این آئی) مسلم لیگ (ن) پنجاب کے صدررانا ثناء اللہ نے کہاہے کہ مسلم لیگ (ن)کا ایک ہی بیانیہ ہے اور وہ نواز شریف کا ہے، سابق وزیر اعظم نے ہمیشہ سویلین بالا دستی کی بات کی، ویڈیو بنانے والے سامنے آئیں اور فرانزک کرائیں، چیئرمین نیب اور ارشد ملک کی ویڈیو کی وجوہات تھیں، پتہ نہیں ویڈیو کے ذریعے محمد زبیر سے کیا منوانا چاہتے ہیں،
آرمی چیف کی مدت ملازمت میں معیاد کا فیصلہ پارٹی مشاورت سے ہوا۔رانا ثنا اللہ نے پریس کانفرنس کرتے ہوئے کہا کہ جاری کی گئی ویڈیو پر محمد زبیر کے موقف کا علم نہیں، سمجھ نہیں آتی ویڈیو کے ذریعے محمد زبیر سے کیا منوانا چاہتے ہیں، ویڈیو معاملے پر محمد زبیر کو ٹارگٹ کیا گیا ہے، میڈیا ویڈیو کے حوالے سے تحقیق کرے، فرانزک آڈٹ کے بغیر سوشل میڈیا پر ویڈیو غلط رجحان ہیں ایسے حالات آ سکتے ہیں کہ ہر کسی کی فیک یا درست ویڈیو جاری ہو۔انہوں نے کہاکہ جج ارشد ملک کی ویڈیو ملین ڈالرز کی ویڈیو تھی جس نے تاریخ بدل دی، جج ارشد ملک اپنی زندگی میں بھی غلطی پر نادم رہے، ملٹی بلین ڈالرز کی ویڈیو تھی جس سے چیئرمین نیب کو قابو کیا جس سے اپوزیشن کو دبایا گیا۔ انہوں نے کہاکہ محمد زبیر کی ویڈیو بہت محنت کا کام ہے کب سے پیچھے لگے ہوئے تھے اس وقت پتہ چلے گا کہ جس نے یہ ریلیز کروائی، چیئرمین نیب اور ارشد ملک کی ویڈیو کی وجوہات تھیں، پتہ نہیں زبیر صاحب سے کیا منوانا چاہتے ہیں،سیاست سے آگے چیز چلی جائے گی غیر اخلاقی عمل کی سپورٹ نہیں کرتے، جنہوں نے دھڑوں کی بات کی ان سے پوچھا جائے، مجھے یہ معلوم ہے کہ جماعت کا لیڈر نواز شریف ہے لیڈر شپ اتنی مضبوط ہے اس پر کسی کو اختلاف نہیں ہے، بیانیہ مختلف ہوسکتاہے کسی کی بات میں چناؤ مختلف ہوسکتاہے، نوازشریف کی ووٹ کو عزت تیس سال سے پالیسی ہے۔
انہوں نے کہاکہ ہمارا احتساب چیئرمین نیب کی ویڈیو کا شاخسانہ ہے، جب تک محمد زبیر کی ویڈیو فرانزک ہو یا سچ ثابت نہ ہو جائے تب تک ذاتی ویڈیو ہوگی،کسی غیر اخلاقی عمل کی حمایت نہیں کرتا۔ ساہیوال ڈویژن کو تنظیمی طورپر منظم و متحرک کریں گے، جادو ٹونے پر ایمان ہے نہ ہی ایسا کیا۔انہوں نے کہاکہ آرمی چیف کی مدت ملازمت میں معیاد کا فیصلہ پارٹی مشاورت سے ہوا، جب پارٹی نے آرمی چیف کی مدت ملازمت میں توسیع کا فیصلہ کر لیا تو وہ فیصلہ درست فیصلہ تھا۔
