سنگاپور(نیوزڈیسک)برطانوی وزیرا عظم ڈیوڈ کیمرون اپنے دورہ جنوب مشرقی ایشیاء کے دوسرے روز سنگاپور پہنچ گئے ۔ انہوں نے لی یوآن یو اسکول آف پبلک پالیسی میں اپنے خطاب میں واضح کیا کہ برطانیہ میں کالے دھن کی کوئی گنجائش نہیں ہے، بین الاقوامی دھوکے بازوں کیلئے میرا یہ پیغام ہے کہ وہ کرپشن سے حاصل کیا جانے والا پیسہ لندن میں نہیں چھپاسکتے۔ واضح رہے کہ لندن میں مختلف تنظیمیں جائیداد کی بڑھتی ہوئی قیمتوں کیخلاف مہم چلارہی ہیں اور ان کا کہنا ہے کہ کرپشن سے کمایا جانے والا پیسہ لندن میں پراپرٹی کی قیمتوں میں اضافے کی اہم وجہ ہے تاہم کیمرون نے واضح کیا کہ برطانیہ میں ریئل اسٹیٹ کے شعبے میں سرمایہ کاری کرنےوالی بیشتر غیر ملکی کمپنیاں قانونی طریقے سے کام ررہی ہیں۔ لندن میں 36 ہزار پراپرٹیز غیر ملکی کمپنیوں کی ملکیت ہیں۔ڈیوڈ کیمرون نے کہا کہ اب برطانیہ میں پیسہ لگانے والی فرمز سے ان کی شفافیت کے شواہد مانگے جائیں گے اور انہیں واضح کرنا ہوگا کہ ان کے مالکان اصل میں کون ہیں اور پیسہ کہاں سے آرہا ہے۔انہوں نے کہا کہ انگلینڈ اینڈ ویلز میں 122 ارب پائونڈز کی جائیداد غیر ملکی کمپنیوں کے ذریعے فروخت کی گئی ہیں ، ہم جانتے ہیں کہ لندن میں بعض انتہائی قیمتی عمارتیں غیر ملکی شہریوں نے نامعلوم کمپنیوں کو ڈھال بناکر خریدی ہیں اور ان کی خریداری میں منی لانڈرنگ کی گئی ہے۔انہوں نے کہا کہ ہم اس بات کی کوشش کررہے ہیں کہ برطانیہ غبن کے پیسے کی سرمایہ کاری کیلئے محفوظ ٹھکانہ نہ بنے۔ڈیوڈ کیمرون سنگاپور سے اب ویتنام اور ملائیشیا بھی جائیں گے