لاہور (آن لائن) ضلع کچہری لاہور کی بالائی منزل میں موجود شہریوں نے ایک شخص کی خودکشی کرنے کی کوشش ناکام بنادی۔ بتایا گیا ہے کہ اس کوشش میں ملوث شہری عبدالرحمن نے خود کشی سے قبل اپنے سر کو دیواروں کے ساتھ پھوڑا اور بعد میں بالائی منزل سے چھلانگ لگانے کی کوشش کی۔ خودکشی کی کوشش کی وجہ بیان کرتے ہوئے عبدالرحمن نے بتایا کہ اس
نے کچھ عرصہ قبل صباء نامی لڑکی سے پسند کی شادی کی تھی۔ جس پر صباء کے اہل خانہ نے اس کے خلاف صباء کے اغواء کا مقدمہ درج کروا دیا اور گزشتہ روز عدالت میں پیشی کے موقع پر اس کی بیوی نے اپنے والدین کے ساتھ جانے کے لئے بیان دے دیا، جس پر وہ دل برداشتہ ہوگیا تھا۔ اس کا یہ بھی کہنا تھا کہ وہ اپنی بیوی سے پیار کرتا ہے لیکن بیوی نے اسے چھوڑ دیا ہے۔
