سری نگر، اسلام آباد(این این آئی)سینئر کشمیری حریت رہنما سید علی گیلانی کو رات کے اندھیرے میں سخت سیکیورٹی میں سپردِ خاک کیئے جانے کے حوالے سے ان کے نمائندہ خصوصی عبداللہ گیلانی کا ویڈیو بیان سامنے آیا ہے،سید علی گیلانی کے نمائندہ خصوصی عبداللہ گیلانی نے کہاہے کہ بھارتی فوج نے سید علی گیلانی کا جسدِ خاکی قبضے میں لیا تھا۔

میڈیارپورٹس کے مطابق ایک بیان میں عبداللہ گیلانی کا مزید کہنا تھا کہ نہیں معلوم کہ سید علی گیلانی کی تدفین کہاں کی گئی ہے۔سید علی گیلانی کے نمائندہ خصوصی نے الزام عائد کیا کہ سید علی گیلانی کے اہلِ خانہ پر تشدد کیا گیا ہے۔دوسری جانب سینئر کشمیری رہنما سید علی گیلانی کے اہل خانہ کی جانب سے مطالبہ سامنے آیا کہ سید علی گیلانی کی تدفین ان کی خواہش کے مطابق مزارِ شہدا میں کرنے دی جائے۔سید علی گیلانی کے اہل خانہ کا یہ بھی کہناتھا کہ پورے کشمیر کو بند کر دیا گیا ہے، مواصلاتی رابطے بند کر دیئے گئے ہیں۔دوسری جانب کشمیر کی جدوجہد آزادی کی نشانی، سینئر کشمیری حریت رہنما سید علی گیلانی کے انتقال پر پاکستان بھر میں سرکاری سطح پر یومِ سوگ منایا گیااس سلسلے میں ملک بھر کی اہم عمارتوں پر نصب قومی پرچم سرنگوں رہا۔سید علی گیلانی کی وفات پر آزاد کشمیر میں 3 روزہ سوگ کا اعلان کیا گیا ہے۔واضح رہے کہ سینئر کشمیری حریت رہنما سید علی گیلانی گزشتہ روز بھارتی قید میں

انتقال کر گئے۔انتقال کے وقت سید علی گیلانی کی عمر 92 سال تھی اور 12 برس سے انہیں بھارتی فوج نے گھر میں نظر بند کر رکھا تھا۔سید علی گیلانی کشمیر پر بھارتی قبضے کے بڑے مخالف اور کشمیریوں کے حقِ خودارادیت کے علم بردار تھے۔وزیرِ اعظم عمران خان کے علاوہ صدرِ مملکت ڈاکٹر عارف علوی، آرمی چیف جنرل قمر جاوید باجوہ، امیرِ جماعتِ اسلامی سراج الحق، وفاقی وزیرِ اطلاعات فواد چوہدری، وزیرِ خارجہ شاہ محمود قریشی سمیت حریت رہنمائوں اور پاکستان کے دیگر رہنمائوں نے بھی سید علی گیلانی کے انتقال پر تعزیت کا اظہار کیا ہے۔