اسلام آباد(مانیٹرنگ ڈیسک /این این آئی)الیکشن کمیشن کا حکومت کی تیارکردہ الیکٹرانک ووٹنگ مشینوں پر عدم اطمینان کا اظہار کر دیا ۔ لیکشن کمیشن کا کہنا ہے کہ حکومتی تیار کردہ ای وی ایم معیار پر پورا نہیں اتری۔ الیکشن کمیشن کے اجلاس میں وزارت سائنس و ٹیکنالوجی کے  حکام بھی الیکشن کمیشن کو مطمئن نہ کرسکے، جس پر الیکشن کمیشن نے کئی سوالات کے جوابات طلب کرلئے ہیں۔قبل ازیں الیکشن کمیشن نے کہا ہے کہ اگر الیکٹرانک ووٹنگ مشین سود مند ثابت ہوتی ہے تو الیکشن کمیشن ضرور اس کا استعمال کرے گا ، کمیٹی وزارت سائنس اینڈ ٹیکنالوجی کے ساتھ الیکٹرانک ووٹنگ مشین پر آن بورڈ ہے۔الیکشن کمیشن کی جانب سے بیان میں کہا گیا کہ ای وی ایم پر الیکشن کمیشن کا عدم اعتماد حقائق پر مبنی نہیں، ٹیکنیکل ایوالیویشن کمیٹی تشکیل دی جا چکی ہے،کمیٹی وزارت سائنس کیساتھ الیکٹرانک ووٹنگ مشین پر مشاورت کر رہی ہے، باہمی اتفاق رائے سے اگر حل نکل آتا ہے تو الیکشن کمیشن ووٹنگ مشین کے استعمال کے حق میں ہے۔بیان میں کہا گیا کہ صاف، شفاف اور منصفانہ انتخابات پر یقین رکھتے ہیں، الیکشن کمیشن کو وزارت سائنس اینڈ ٹیکنالوجی نے 17 اگست کو مشینوں پر ڈیمو دیا تھا۔