اسلام آباد (مانیٹرنگ ڈیسک /این این آئی )کابل ائیر پورٹ پر امریکی طیاروں کی آمد کے باعث پاکستان ائیر لائن پھنسنے والے دو طیارے وطن واپس پہنچ چکے ہیں ۔ نجی ٹی وی کے مطابق افغانستان کی موجود صورتحال کے باعث غیر ملکی افغانستان چھوڑ کر جارہے ہیں ، کابل میں امریکی پانچ طیاروں کی آمد کی وجہ سے ائیر پورٹ پر تمام پروازوںکا اڑان یا لینڈ کرنے سے روک دیا گیا تھا ۔

کابل ائیر پورٹ پر نقل و حرکت کے تعطل کی وجہ سے پاکستان ائیر لائن کے دو طیارے اڑان بھرنے کے لیے تیار تھے جن میں چار سو ننانوے مسافر سوار تھے ۔ امریکی طیاروں کی آمد مکمل ہوتے ہی ایئرپورٹ کو دیگر پروازوں کے لیے فعال کردیا گیا۔تاہم دونوں طیارے وطن واپس پہنچ گئے ہیں ۔ واضح رہے کہ افغانستان کے دارالحکومت کابل میں طالبان کے داخل ہونے کی اطلاعات کے بعد کابل کے انٹرنیشنل ائیرپورٹ پر پروازوں کی آمدورفت معطل ہو گئی۔ ذرائع کے مطابق پی آئی اے کے 2 طیارے بھی کابل انٹرنیشنل ائیرپورٹ پر موجود ہیں ، پی آئی اے کا بوئنگ777 طیارہ اور ایک ائیر بس آج صبح اسلام آباد سے کابل پہنچے تھے جن میں سے ایک پرواز اسلام آباد کیلئے اڑان بھرنے کیلئے تیار کھڑی ہے لیکن اسے تاحال پرواز کی اجازت نہیں دی گئی جب کہ دوپہر 12 بجے سے کابل ائیرپورٹ پر نہ کوئی لینڈنگ ہوئی اور نہ ہی کسی طیارے نے ٹیک آف کیا ، بھارتی دارالحکومت نئی دہلی سے کابل پہنچنے والی ائیر انڈیا کی پرواز اے آئی 243 ایک بج کر 42 منٹ پر کابل پہنچی لیکن تاحال لینڈ نہ کر سکی ۔دوسری جانب ترجمان دفترخارجہ زاہد حفیظ چوہدری نے کہاہے کہ کابل کی صورتحال کو مسلسل دیکھ رہے ہیں، سفارتخانہ بند کر نے کا فیصلہ نہیں ہوا۔ ترجمان دفتر خارجہ نے اپنے بیان میں کہاکہ کابل کی صورتحال کو مسلسل دیکھ رہے ہیں ،ابھی کابل میں پاکستانی سفارتخانہ بند کرنے کا کوئی فیصلہ نہیں کیا،پاکستانی سفارتخانہ کابل میں فعال ہے۔زاہد حفیظ چوہدری نے کہاکہ افغانستان میں موجود پاکستانی شہریوں کی امداد کی جا رہی ہے۔ انہوں نے کہاکہ افغانستان کی صورتحال تیزی سے تبدیل ہو رہی ہے ۔ انہوں نے کہاکہ پاکستان کا ہمیشہ موقف رہا کہ افغانستان میں امن ہو ،پاکستان ہمیشہ سے چاہتا ہے کہ سلامتی کی صورتحال مزید خراب نہ ہو۔ ترجمان نے کہاکہ پاکستان کی کوشیش ہے کہ پاکستانی سفارت خانہ بند نہ ہو۔قبل ازیں امریکی فوجیوں کے واپس جانے اور طالبان کی تیز پیش قدمی کے باعث افغانستان میں پھنسے غیر ملکیوں کو نکالنے کے لیے مختلف ممالک کی درخواست پر پاکستان کی قومی ایئر لائن نے آج خصوصی آپریشن کا آغاز کر دیا ہے۔پاکستان انٹرنیشنل ایئر لائن ذرائع کے مطابق پی آئی اے کا ایک بوئنگ 777 طیارہ آج صبح 11 بجے جبکہ ایک ایئر بس صبح 9 بجے اسلام آباد سے کابل پہنچے ہیں۔غیرملکیوں اور مختلف ملکوں کی کمپنیوں کے افغانستان میں پھنسے ورکرز کو کابل سے نکالا جائے گا، مختلف ممالک نے پی آئی اے سے خصوصی آپریشن شروع کرنے کی استدعا کی تھی جس پر پی آئی اے نے افغانستان کے لیے خصوصی پروازیں چلانے کا فیصلہ کیا ہے۔مسافروں کے لوڈ کے پیش نظر پی آئی اے نے افغان سول ایوی ایشن حکام سے اضافی پروازوں کی اجازت لی تھی۔آپریشن کے شیڈول کے حوالے سے جاننے کے لیے پی آئی اے کے ترجمان سے رابطہ کرنے پر انہوں نے بتایا کہ دونوں پروازیں غیر ملکی مسافروں کو لے کر اسلام آباد پہنچیں گی۔ دوسری جانب مریکی صدر جوبائیڈن نے افغانستان سے امریکی شہریوں اور سفارتی عملے کے محفوظ انخلا کے لیے جانے والی فوجیوں کی تعداد دگنی کرنیکا اعلان کر دیا۔غیر ملکی خبر ایجنسی کے مطابق اپنے ایک بیان میں جوبائیڈن کا کہنا تھا کہ امریکی مشن کے خاتمے اور عملے کی بحفاظت واپسی کے لیے 5 ہزار فوجی افغانستان بھیجے جائیں گے۔طالبان کو خبردار کرتے ہوئے صدر جوبائیڈن نے کہا کہ جنگجو انخلا کے مشن پر مامور اہلکاروں کو نقصان پہنچانے سے باز رہیں۔امریکی صدر نے افغانستان سے فوجیوں کے انخلا کے فیصلیکا ایک بار پھر دفاع کرتے ہوئے کہا کہ 4 امریکی صدور کے دور میں ہماری فوج افغانستان میں موجود رہی لیکن وہ اب اس جنگ کوپانچویں صدر تک منتقل نہیں کریں گے۔