لاہور(این این آئی)صوبائی وزیر فیاض الحسن چوہان کوایک بار پھر بطور ترجمان پنجاب حکومت ذمہ داریاں سونپ دی گئیں جبکہ کابینہ میں نئے شامل ہونے والے اسد کھوکھرکو ہاؤسنگ اینڈ پبلک ہیلتھ کا قلمدان سونپ دیا گیا۔ فیاض الحسن چوہان صوبائی وزیر جیل خانہ جات کی
ذمہ داریاں بھی نبھائیں گے۔وزیر جیل خانہ فیاض الحسن چوہان نے کہاہے کہ ترجمان کی اضافی ذمہ داری دئیے جانے پر اعلی قیادت کا تہہ دل سے مشکور ہوں۔ نجی ٹی وی کے مطابق پنجاب حکومت نے فیاض الحسن چوہان کو ترجمان مقرر کرنے کے بعد بقیہ تمام ترجمانوں کو فارغ کر دیا ہے، نوٹیفکیشن بھی جاری کر دیا گیا۔ فیاض الحسن چوہان کا کہنا تھا کہ میں وزیر اعظم عمران خان اور وزیر اعلی پنجاب سردار عثمان بزدار کے اعتماد پر پورا اتروں گا۔انہوں نے کہاکہ بطور ترجمان حکومت بزدار حکومت کی کامیابیاں عوام کے سامنے لانا میرا بنیادی ایجنڈا ہے،بزدار حکومت کے خلاف اپوزیشن کی سازشوں کو بے نقاب کریں گے۔علاوہ ازیں پنجاب کابینہ میں شامل ہونے والے نئے وزیر ملک اسد کھوکھر کو ہاؤسنگ اینڈ پبلک ہیلتھ کا محکمہ الاٹ کر دیا گیا۔وزیر اعلی کی منظوری کے بعد اسد کھوکھر کو محکمہ الاٹ کرنے کا نوٹیفکشن جاری کر دیا گیا۔اسد کھوکھر نے دس اگست کو وزیر کی حیثیت سے حلف اٹھایا تھا۔
