پشاور(این این آئی) پولیس افسر نے آپریشن کے دوران غریب ریڑھی بانوں پر تھپڑوں کی بارش کردی۔نجی ٹی وی ے مطابق شبقدرمیں پولیس کے افسر نے ٹی ایم اے حکام کیساتھ آپریشن میں غریب ریڑھی بانوں پر تھپڑوں کی بارش کردی جس کی ویڈیو وائرل ہونے پر
ڈی آئی جی مردان نے نوٹس لے لیا۔ڈی آئی جی مردان نے کہا ہے کہ ریڑھی بانوں پرتشدد کرنے والا اے ایس آئی معطل کر دیا گیا ہے، اے ایس آئی کے خلاف محکمانہ کاروائی کا حکم دے دیا گیا ہے۔دوسری جانب راولپنڈی کے تین پولیس اہلکاروں کو ٹک ٹاک پر ویڈیو بنانا مہنگا پڑ گیا، سی پی او نے نوٹس لیکر تینوں کو معطل کردیا۔ تفصیلات کے مطابق راولپنڈی پولیس کے تین اہلکاروں کو ٹک ٹاک ویڈیو بنانا مہنگا پڑ گیا۔ ویڈیو سامنے آنے پر سی پی او محمد احسن یونس نے نوٹس لیتے ہوئے ہیڈ کانسٹیبل عادل حسین، کانسٹیبل حمزہ اور کانسٹیبل رضوان کو معطل کردیا۔اہلکار تھانہ آر اے بازار میں تعینات تھے اور انہوں نے موبائل میں بیٹھ کر اسلحے کے ساتھ ٹک ٹاک ویڈیو بنائی تھی۔ پولیس حکام کے مطابق ویڈیو بناکر ٹک ٹاک پر اپلوڈ کرنا پنجاب پولیس کی سوشل میڈیا پالیسی اور محکمانہ قواعد و ضوابط کے خلاف ہے، اہلکاروں کے خلاف محکمانہ کارروائی عمل میں لائی جا رہی ہے۔
