اسلام آباد(آن لائن)وفاقی دارلحکومت میں کرونا کی چوتھی لہر کے پیش نظرنیشنل کمانڈ اینڈ آپریشن سنٹر کی ہدایت پر وفاقی ضلعی انتظامیہ نے پابندیوں کا نیا نوٹیفکیشن جاری کر دیاہے ،مارکیٹیں رات 8بجے تک کھلی رہیں گی،ہفتہ میں دو چھٹیوںکے
علاوہ تمام کمر شل سرگرمیاں معطل رہیں گی،ڈپٹی کمشنر حمزہ شفقات نے نوٹیفکیشن جاری کر دیا،میڈیکل اسٹور،پٹرول پمپ،تندوراور بیکریاں پابندیوں سے مستثنیٰ ہوں گی ۔گزشتہ روز منگل کو ڈپٹی کمشنر کے نوٹیفکیشن کے مطابق کرونا کی چوتھی اور ڈیلٹا وائرس کے بڑھتے ہوئے کیسوں کے پیش نظر انڈورڈائٹنگ مکمل بنداور باہر ڈائٹنگ کا وقت دس بجے تک مقرر کر دیا گیا ہے ،ہفتہ میں دو دن چھٹی کا اطلاق ہوگا،تمام مزارات ،سینما گھروں، جم اور انڈور کھیلوں کی سرگرمیوں پر مکمل پابندی ہو گی،اور سرکاری و نجی دفاتر میں 50 فیصد عملہ کے ساتھ کام کر سکتے ہیں،8 اگست سے ان ڈور شادیوں پر مکمل پابندی ہو گی تا ہم آؤٹ ڈور شادی کی تقریبات میں400 افراد ایس او پیز کے ساتھ شرکت کر سکیں گے ۔نوٹیفکیشن کے مطابق ثقافتی تہواراور اجتماعات پر مکمل پابندی عائدہو گی اور پابندیوں کا اطلاق پورے اسلام آباد میں ہوگا، شہر بھر کی داخلہ اور خارجی ٹرانسپورٹ میں مسافروں کی تعداد گنجائش سے پچاس فیصد کم رکھی جائے گی۔نوٹیفکیشن کا اطلاق3 اگست سے 31اگست تک نافذالعمل ہو گا۔
