ریاض (این این آئی )سعودی حکومت نے سیاحتی ویزوں کے اہل 49 ممالک کی فہرست جاری کردی، ان ممالک کے شہری 90 دن کے ویزے پر سعودی عرب آسکتے ہیں۔سعودی میڈیا کی رپورٹ کے مطابق سیاحتی ویزے آن لائن الیکٹرانک سسٹم سے جاری ہوں گے۔رپورٹ کے مطابق فہرست میں امریکا، کینیڈا، آسٹریا، بیلجیئم، برطانیہ اور دیگر ممالک شامل ہیں۔
رپورٹ میں مزید کہا گیا ہے کہ 49 ممالک کی فہرست میں پاکستان، بھارت اور بنگلا دیش شامل نہیں۔سعودی عرب کی منظور شدہ ویکسین لگانے والے سیاحوں کو ملک میں آنے کی اجازت ہوگی۔سعودی حکام کے مطابق ویکسین کی دونوں خوراکیں لگانے والوں کو بغیر قرنطینہ داخلے کی اجازت ہوگی، سیاحوں کو صرف ویکسینیشن سرٹیفیکیٹ دکھانا ہوگا۔دوسری جانب مسجد حرام اور مسجد نبویۖ کے امور کی جنرل پریذیڈنسی نے اتوار یکم اگست 2021 سے اپنے مرکزی صدر دفتر اور اس سے ملحقہ تنصیبات میں داخل ہونے کے لیے کرونا کی ویکسی نیشن کو لازم قرار دینے کا نظام نافذ کر دیا ہے۔ اس طرح ویکسی نیشن نہ کرانے والوں کا داخلہ ممنوع ہو گا۔میڈیارپورٹس کے مطابق یہ اقدام مملکت سعودی عرب کی جانب سے کرونا وائرس کووڈ 19کی روک تھام کے لیے عمل میں آنے والے احتیاطی اقدامات اور حفاظتی تدابیر کا حصہ ہے۔ اس سلسلے میں کسی بھی سرکاری عمارت یا تنصیب میں داخلے کے لیے وزارت
صحت کی منظور شدہ ویکسی نیشن کرانا شرط قرار دی گئی ہے۔سیکورٹی اینڈ سیفٹی جنرل ایڈمنسٹریشن کے ڈائریکٹر جنرل فائز بن عبدالرحمن الحارثی کے مطابق لوگوں کی آمد و رفت کے حوالے سے توکلناایپلی کیشن سے تصدیق کو لازم کر دیا گیا ہے۔ ساتھ ہی سماجی فاصلے ، ماسک لگانے اور ہاتھوں کی مسلسل سینی ٹائزیشن کو بھی یقینی بنایا جا رہا ہے۔
الحارثی کے مطابق یہ تمام اقدامات مسجد حرام اور مسجد نبوی کے امور کی جنرل پریذیڈنسی کے نگران اعلی شیخ ڈاکٹر عبدالرحمن بن عبدالعزیز السدیس کی ہدایات پر کیے گئے ۔ ان کا مقصد شہریوں اور مقیمین حضرات کی سلامتی اور حرمین شریفین کا رخ کرنے والوں کے لیے بہترین خدمات پیش کرنے کو یقینی بنانا ہے۔
