لاہور (آن لائن)وفاقی حکومت نے لاہور سمیت ملک بھر کے یوٹیلیٹی سٹوروں پر اشیائے ضروریہ کی قیمتوں میں مزید اضافہ کردیا ہے۔ اس اضافے کے بعد یوٹیلیٹی سٹوروں پر اشیائے ضروریہ ملک کے غریب شہریوں کی پہنچ سے مزید دور ہوگئی ہیں یہ بھی بتایا گیا ہے کہ وفاقی کابینہ نے یوٹیلیٹی سٹوروں پر گھی چینی اور آٹے کی قیمتوں میں اضافے کی منظوری دے دی ہے جس کے مطابق چینی کی قیمت میں اضافے کے بعد یوٹیلیٹی سٹوروں پر چینی 85 روپے فی کلو 20 کلو آٹے کے تھیلے کی قیمت میں 150 روپے اضافہ کے بعد آٹے کی قیمت 1 ہزار روپے فی کلو جبکہ گھی کی قیمت 260 روپے فی کلو کی سطح پر پہنچ گئی ہے مزید برآں شہر میں گراں فروشوں کا راج بدستور جاری ہے اور گراں فروش شہریوں سے مختلف سبزیوں کی من مانی قیمتیں موصول کر رہے ہیں۔ عام بازاروں میں اشیائے ضروریہ کی بڑھتی ہوئی قیمتوں کا نوٹس لیتے ہوئے ڈپٹی کمشنر لاہور نے ناقص کارکردگی کا مظاہرہ کرنے والے پرائز کنٹرول مجسٹریٹوں کو عہدوں سے فارغ کرنے کا فیصلہ کیا ہے اور اس حوالے سے لاہور کے 4 پرائس کنٹرول مجسٹریٹوں کی جواب طلبی کرلی ہے۔