لندن(نیوزڈیسک)ملکہ برطانیہ الزبتھ کو 1933 میں نازی سلوٹ سکھایا گیا۔ایک برطانوی اخبار نے شاہی خاندان کی پرانی ویڈیوز سے لی گئی تصویر شائع کی ہے ، جس میں ملکہ الزبتھ دوم کو بچپن میں ’نازی سلیوٹ‘ کرتے ہوئے دکھایا گیا ہے ، شاہی خاندان نے تصویر کی اشاعت پر تحقیقات کا اعلان جبکہ عوام نے حیرانی کا اظہار کیا ہے ، برطانوی اخبار کی جانب سے جاری 17 سیکنڈ دورانیے کی یہ تاریخی وڈیو آٹھ عشرے پہلے اس وقت بنائی گئی تھی، جب جرمنی میں نازی آمر اڈولف ہٹلر نے اقتدار سنبھالا تھا ، اور اُس وقت ملکہ کی عمر تقریباً سات برس تھی ۔وڈیو سے لی گئی اس بلیک اینڈ وائٹ تصویر میں شہزادی الزبتھ کی والدہ بھی نازیوں کی طرح اپنے دائیں ہاتھ کو ایک مخصوص انداز میں ہوا میں لہراتے ہوئے دیکھی جاسکتی ہیں۔اس وڈیو میں شہزادی الزبتھ اپنی بہن شہزادی مارگریٹ اور والدہ کے ساتھ کھیل رہی ہیں جبکہ ان کے انکل اور مستقبل کے بادشاہ ایڈورڈ ہشتم بھی ان کے ساتھ ہیں، جو بظاہر ان بچیوں کی حوصلہ افزائی کر رہے ہیں۔دوسری جانب، بکنگھم پیلس کے ترجمان نے بیان میں 1933ء میں بنائی گئی وڈیو سے لی گئی تصویر کی اشاعت کو مایوس کن امر قرار دیا ہے اور کہاہے کہ شاہی خاندان کی نجی وڈیو سے بنائی تصویر کا غلط استعمال کیا گیا ہے۔ اس سلسلے میں پولیس نے تحقیقات شروع کر دی ہیں کہ وڈیو کیسے حا صل کی گئی اور یہ کہیں اس کے پیچھے مجرمانہ سرگرمی تو نہیں