لاہور، کراچی(این این آئی) لاہور،کراچی، اسلام آباد سمیت ملک بھر کیلئے فضائی سفر کرنے والوں پرسول ایوی ایشن اتھارٹی کی جانب سے ٹکٹ پر600روپے کے نئے ٹیکس عائد کردیئے گئے۔ 17مئی سے پہلے خریدے گئے ٹکٹ پر سفر سے پہلے اضافی 600روپے

لئے جائیں گے۔ٹکٹ پر سو روپے سکیو رٹی فیس اورپانچ سو روپے ایمبارکشن فیس لی جائے گی۔17مئی کے بعد خریدے گئے ٹکٹ میں اضافی ٹیکس شامل ہے۔مسافروں کا کہنا ہے کہ پہلے سے خریدے گئے فضائی ٹکٹ پر 600 روپے کا ٹیکس لگانا ناانصافی ہے اور پہلے سے خریدے گئے ٹکٹ پر اضافی چارجز کیسے لگائے جاسکتے ہیں۔دوسری جانب پی آئی اے کی جانب سے کراچی سے ژوب کے لئے ہفتہ وار دو پرواز وں کا آغاز کر دیا گیا،پہلی پرواز منگل کی صبح کراچی سے ژوب کے لئے بھیجی گئی ،جناح انٹرنیشنل ائیرپورٹ کراچی پر پرواز کی روانگی سے قبل ایک افتتاحی تقریب منعقد کی گئی اور کیک کاٹا گیا۔ مسافروں کو ڈسٹرکٹ مینیجر پی آئی اے فیصل کھرل، پی آئی اے کی ائیرپورٹ مینیجر اولمپئن احمد عالم اور پی آئی اے کے سینئر افسران نے رخصت کیا۔ ژوب پرواز کے آغاز پر مسافروں نے سی ای او پی آئی اے ایئر مارشل ارشد ملک اور ایئر لائن انتظامیہ کا شکریہ ادا کیا۔ائیر مارشل ارشد ملک نے کہاکہ مسافروں کو بہترین سروس فراہم کی جائیں، پرواز کے آغاز سے ژوب اور کراچی کے شہر یو ں اور کاروباری برادر ی کا درینہ مطالبہ پورا ہو گیا۔ سی ای ا و پی آئی اے نے کہاکہ پی آئی اے کراچی، ژوب ، کراچی کے لئے ہر منگل اور جمعہ کو فلائٹ آپریٹ کرے گی۔