کراچی (این این آئی)پاکستان کرکٹ ٹیم کے سابق کپتان شاہد آفریدی کو میری لیبون کرکٹ کلب (ایم سی سی) کی اعزازی ممبر شپ سے نواز دیا گیا ہے۔سوشل میڈیا سائٹ ٹوئٹر پر تصاویر جاری کرتے ہوئے کرکٹر شاہد آفریدی نے کہا کہ ایم سی سی کی لائف ٹائم اعزازی ممبر شپ حاصل کرنا کسی اعزاز سے کم نہیں۔انہوں نے کہا کہ میں دنیا کے سب سے معزز کرکٹ کلب کا یہ اعزاز دینے پر
شکریہ ادا کرنا چاہتا ہوں۔شاہد آفریدی نے کہا کہ میں کرکٹ کے میدان میں اور باہر بھی اس حیرت انگیز کھیل کے فروغ میں اپنا کردار ادا کرتا رہوں گا۔دوسری جانبپاکستان کرکٹ بورڈ (پی سی بی) نے پی ایس ایل کے بقیہ میچز کے لیے این سی او سی سے رابطے تیز کردئیے۔ترجمان پی سی بی کے مطابق این سی او سی کی گائیڈ لائن کے مطابق آئندہ بھی فیصلہ کیا جائیگا، کراچی میں بقیہ میچز کرانے کا فیصلہ بھی این سی او سی کو اعتماد میں لے کر کیا تھا۔ترجمان کے مطابق موجودہ صورتحال کا بغور جائزہ لیا جا رہا ہے ، تمام اسٹیک ہولڈرز کی صحت اور حفاظت کے لیے فیصلہ کیا جائے گا۔ترجمان کے مطابق پی ایس ایل کے میچز کے لیے تیزی سے کام جاری ہے ، ابھی تک پی ایس ایل کے میچز شیڈول کے مطابق کراچی میں ہوں گے۔ترجمان پی سی بی نے کہا کہ یہ کہنا قبل از وقت ہے کہ ٹورنامنٹ دبئی شفٹ ہوگا یا لاہور، ابھی ’انتظار کرو اور دیکھو‘ کی پالیسی ہے لیکن کراچی میں ایونٹ کی تیاری ہو رہی ہے۔
