لاہور(نیوزڈیسک) صوبائی دارالحکومت کے 18 مدارس کو امریکہ سمیت دیگر ممالک کی جانب سے امداد دیئے جانے کا انکشاف ہوا ہےجس پر خفیہ اداروں نے ان مدارس کے تمام ریکارڈ کی جانچ پڑتال اور انکی مانیٹرنگ شروع کر دی ہے۔ باوثوق ذرائع کا کہنا ہے کہ حکومت کی جانب سے حساس اور خفیہ اداروں کو ٹاسک دیا گیا تھا کہ وہ ایسے مدارس کی تفصیلات اکٹھی کریں جنہیں غیر ملکی امداد دی جاتی ہے، جس پر ایک خفیہ تفصیلی رپورٹ حکومت کو دی گئی ہے۔ ’’جنگ‘‘ کو ملنے والی ایک مصدقہ دستاویزات کے مطابق صرف لاہور کے 18 ایسے مدارس ہیں جنہیں مختلف ممالک کی جانب سے براہ راست یا بالواسطہ غیر ملکی امداد دی جا رہی ہے جبکہ چند ایسے مدارس کی بھی نشاندہی ہوئی ہے جنہیں غیر ملکی امداد’’ہنڈی ‘‘کے ذریعے بھی ملتی ہے تاہم حکومت نےہنڈی کے ذریعے مالی امداد لینے والے ان مدارس کی بھی مانیٹرنگ کے احکامات جاری کر دیئے ہیں۔ لاہور میں ایک مسلک کے علاوہ تمام مسالک کے مدارس کو سعودی عرب، امریکہ، قطر، متحدہ عرب امارات، ایران، کویت کی جانب سے امداد ملتی ہے۔ ذرائع کا کہنا ہے کہ ان مدارس میں بعض ایسے مدارس بھی ہیں جو ان غیر ملکی ممالک سے مختلف پروگرامز کے آغاز کے نام پر بھی کروڑوں روپے کی امداد لیتے ہیں۔ذرائع کا یہ بھی کہنا ہے کہ امریکہ کی جانب سے بعض مدارس کو کمپیوٹرز پروگرامز شروع کرنے کے حوالے سے بھی امداد دی جا رہی ہے۔