امریکا کی سب سے بڑی اور سب سے برفیلی ریاست الاسکا میں سال بھر برف کا راج رہتا ہے اور ہزاروں لاکھوں کلومیٹر تک زمین برف سے ڈھکی نظر آتی ہے۔ اگرچہ یہاں شدید سردی اور برف کی وجہ سے امریکا کے دیگر علاقوں کی نسبت زندگی بہت مشکل ہے مگر یہاں کے دور دراز دیہاتوں میں بھی گرما گرم پیزا بروقت پہنچانے کا بندوبست موجود ہے، اور وہ بھی ہوائی جہاز کے ذریعے۔کپتان سینٹ ٹامٹر کہتے ہیں کہ فضائی کمپنی فرنٹیئر فلائنگ سروس کے ذریعے پیزا کی ڈلیوری مفت کی جاتی ہے ۔ کپتان ٹامٹر کہتے ہیں کہ وہ 30 ڈالر کا پیزا لے کر گاہکوں تک برق رفتاری سے پہنچتے ہیں اور روزانہ تقریباً 10 پیزے بے چینی سے منتظر گاہکوں تک پہنچاتے ہیں۔ وہ کہتے ہیں کہ اگر پرواز میں تاخیر نہ ہو تو وہ اکثر عین وقت پر پیزا پہنچاتے ہیں، اور فضائی ڈلیوری کا یہ منفرد طریقہ الاسکا کے دیہاتوں میں بہت مقبول ہورہا ہے۔
کپتان ٹامٹر کہتے ہیں کہ وہ اس دور دراز برفیلے علاقے تک بھی امریکی خواب پہنچارہے ہیں ’’اپنے گھر کے مالک بنو۔ آگے بڑھو اور تعلیم کا حق حاصل کرو۔ اور اپنے گھر پر پیزا کی ڈلیوری حاصل کرو۔‘‘