سکھر(این این آئی)سندھ کے شہر سکھر میں بھائی کا خواب پورا نہ کرنے پر میڈیکل کے طالب علم نے خودسوزی کرلی۔رپورٹ کے مطابق سکھر میں میڈیکل کے طالب علم طارق نے بھائی کا خواب پورا نہ کرنے پر اپنی زندگی کا خاتمہ کر لیا، نوجوان نے خودسوزی سے قبل خط بھی لکھا جس میں ماں سے محبت کا اظہار کیا گیا۔متوفی طارق
کے بھائی راجہ غضنفر نے اس ضمن میں بتایاکہ طارق جی ایم سی کالج میں فائنل ایئر کا طالب علم تھا، طارق کا رزلٹ آیا تھا جس میں وہ ایک پیپر میں فیل ہوگیا تھا۔بھائی نے بتایاکہ میں نے طارق کو سمجھایا تھا کہ کوئی بات نہیں پیپر دوبارہ پاس کرلینا لیکن وہ دلبرداشتہ تھا جس کے سبب اس نے اپنی زندگی کا خاتمہ کر لیا۔راجہ غضنفر کے مطابق طارق کے دوست نے فون کرکے بتایا کہ آپ کے بھائی نے خودسوزی کرلی ہے۔طارق کے بھائی کے مطابق ہم تحقیقات کا انتظار کررہے ہیں، بھائی کے اوپر کوئی دبائو ہوگا جس کے سبب اس نے خودسوزی کی ہے، بغیر کسی دبائو کے وہ ایسا نہیں کر سکتا۔دوسری جانب واقعے پر ڈاکٹر معیز کا کہنا تھا کہ بچوں کو کہا جاتا ہے کہ امتحانات میں اچھے نمبر لانے ہیں تو بچوں کے ذہن میں یہ بیٹھ جاتا ہے کہ انہیں والدین کی توقعات کو پورا کرنے کے لیے اچھے نمبروں سے پاس ہونا ہے اور جیسے جیسے بچے بڑے ہوتے جاتے ہیں یہ عمل ان کے ذہن میں پختہ ہوجاتا ہے۔ڈاکٹر معیز نے کہا کہ والدین کو یہ سمجھنا ہوگا کہ بچوں کو پریشر نہ دیں، نوجوان کو امید تھی کہ اس کے اچھے مارکس آئیں گے لیکن نہیں آئے، ہوسکتا ہے کہ وہ اسی وجہ سے مایوس ہوگیا ہو اور اس نے یہ انتہائی قدم اٹھایا۔
