اسلام آباد(این این آئی) حکومت نے پہلی سے آٹھویں تک اسکولزعید تک بند رکھنے اور 9 ویں سے 12 ویں تک تعلیمی ادارے (آج)پیر سے سخت کورونا ایس او پیز کے ساتھ کھولنے کا فیصلہ کیا ہے۔اتوار کو وفاقی وزیر تعلیم شفقت محمود کی سربراہی میں بین الصوبائی وزرائے تعلیم کا ہنگامی اجلاس ہوا، جس میں تمام وزرائے تعلیم نے ویڈیو لنک کے ذریعے شرکت کی، اجلاس میں تعلیمی اداروں میں

کلاسز کی بحالی پر تبادلہ خیال کیا گیا۔اجلاس میں تمام صوبائی وزرائے تعلیم نے بورڈز کلاسز شروع کرنے کی سفارش کی، تاہم این سی او سی کے حکام نے کہا کہ کیسز بڑھ رہے ہیں، ابھی تعلیمی ادارے نہ کھولیں تو بہتر ہو گا۔اجلاس میں فیصلہ کیا گیا کہ ملک بھر میں پہلی سے آٹھویں تک اسکولزعید تک بند رکھے جائیں گے، 9 ویں سے 12 ویں تک تعلیمی ادارے (آج)پیر سے سخت کورونا ایس او پیز کے ساتھ کھولنے کا فیصلہ کیا گیا۔ اجلاس میں او ، اے لیول امتحانات شیڈول کے مطابق لینے کا فیصلہ ہوا، کہا گیا کہ کورونا کی زیادہ شرح والی یونیورسٹیز میں آن لائن کا سلسلہ جاری رہے گا۔‎ مائیکرو بلاگنگ ویب سائٹ ٹوئٹر پر پیغامات میں شفقت محمود نے بتایاکہ کلاسز بحالی کا فیصلہ بورڈ امتحانات کی تیاری کیلئے کیا گیا، نویں سے 12ویں جماعت کے امتحانات بورڈز کی اعلان کردہ نئی تاریخوں کے مطابق لیے جائیں گے۔انہوں نے واضح کیا کہ مذکورہ بالا جماعتوں کے امتحانات مئی کے چوتھے ہفتے سے قبل شروع نہیں ہوں گے۔انہوں نے بتایا کہ امتحانات کے نئے ٹائم ٹیبل کو مدِ نظر رکھتے ہوئے یونیورسٹیز کے داخلہ شیڈول کو بھی ایڈجسٹ کیا جائیگا۔وزیر تعلیم نے بتایا کہ اجلاس میں تمام وزرا کے اتفاق رائے سے اس بات کا بھی فیصلہ کیا گیا کہ اے، ایز، او اور آئی جی سی ایس ای امتحانات سی اے آئی ای ایس کے اعلان کردہ تاریخوں کے مطابق ہوں گے تاہم جو طلبہ اکتوبر/نومبر میں یہ امتحانات دینا چاہتے ہیں وہ پہلے سے جمع کروائی گئی فیس میں ہی وہ امتحان دے سکتے ہیں۔اجلاس میں بتایا گیا کہ کیمبرج نے فیصلہ کیا ہے رواں سال اساتذہ کو گریڈز دینے کا اختیار نہیں دیا جائے گا اس لیے جو امتحانات نہیں لے رہے وہ اکتوبر/ نومبر کے اگلے مرحلے میں امتحانات لے سکتے ہیں۔وزیر تعلیم نے بتایا کہ کیمبرج نے امتحانات کے سلسلے میں تمام اسٹینڈرڈ آپریٹنگ پروسیجرز (ایس او پیز) پر عملدرآمد کی یقین دہانی کروائی ہے۔‎