اسلام آباد(مانیٹرنگ ڈیسک)محکمہ موسمیات نے ملک میں اگلے 4 سے 5 روز کے دوران بالائی اور وسطی علاقوں میں آندھی و گرج چمک کے ساتھ بارش کی پیش گوئی کردی۔محکمہ موسمیات کے مطابق گزشتہ رات ملک میں داخل ہونے

والی مغربی ہوائوں کاسلسلہ ہفتے تک ملک میں مو جود رہے گا جس کے باعث اتوار تک کشمیر، گلگت بلتستان ،چترال، دیر، سوات، شانگلہ، بونیر، کوہستان، مانسہرہ، ایبٹ آباد، ہری پور، کوہاٹ، بنوں، پشاور، کرم، وزیر ستان، اسلام آباد، راولپنڈی، مری، اٹک، چکوال میں آندھی اور گرج چمک کے ساتھ بارش کا امکان ہے۔اس دوران بعض مقامات پر ژالہ باری کا بھی امکان ہے۔دوسری جانب وفاقی دارالحکومت اسلام آباد اور جڑواں شہر راولپنڈی میں رات سے لیکر اب تک وقفے وقفے سے بارش کا سلسلہ جاری ہے ، جس کی وجہ سے نظام زندگی مفلوج ہو کر رہ گیا ہے ، کئی علاقوں میں بجلی غائب ہے ، روزہ داروں کو شدید پریشانی کا سامنا ہے ۔ وزارت توانائی و بجلی کا کہنا ہے کہ متاثرہ علاقوں میں امدادی ٹیمیں کام کر رہی ہیں ، جلد بجلی بحال کردی جائیگی ۔