لاہور(این این آئی)لاہور ہائیکورٹ نے حکومت کو رمضان المبارک میں شوگر ملز سے چینی 80 روپے کلو کے حساب سے خریدنے کا حکم دیتے ہوئے شوگر کین کمشنر کو عدالتی احکامات پر عملدرآمد یقینی بنانے کیلئے اقدامات کرنے کی ہدایت کر دی۔لاہور ہائیکورٹ کے جسٹس شاہد جمیل خان نے شوگر ملز کی ایک ہی نوعیت کی الگ الگ درخواستوں پر سماعت کی۔

درخواستوں میں سرکاری طور پر شوگر ملز سے 80 روپے کلو کے حساب سے چینی خریدنے کے احکامات کو چیلنج کیا گیا تھا۔عدالت نے سرکاری حکام اور شوگر ملز کو دو مرتبہ مشاورت کیلئے مہلت دی لیکن کوئی نتیجہ نہ نکل سکا۔ پنجاب حکومت کی جانب سے بتایا گیا کہ صوبے کی شوگر ملز کے پاس 25 لاکھ ٹن چینی موجود ہے جبکہ رمضان المبارک میں ایک لاکھ 55 ہزار ٹن چینی کی کھپت ہو گی۔سماعت کے دوران شوگر ملز کے وکلا ء نے 20 لاکھ ٹن تک چینی 83 روپے کلو تک بیچنے کی پیشکش کی۔ عدالت کے روبرو فریقین کے درمیان اتفاق رائے نہ ہونے پر عدالت نے عارضی بنیادوں پر رمضان کے دوران شوگر ملز سے ایک لاکھ 55 ہزار ٹن چینی 80 روپے کلو کے حساب سے خریدنے کا حکم دیدیا۔عدالت نے ریمارکس دیئے کہ ماہ رمضان المبارک میں عوام کو چینی ملنی چاہیے، یہ ثواب کا کام ہے۔ عدالت نے پنجاب کی 40 شوگر ملز سے ان کی استطاعت کے مطابق چینی خریدنے کا حکم دیا۔عدالت عالیہ نے ایڈووکیٹ جنرل پنجاب کو چینی کی قیمت کے تعین کیلئے رولز اور ضروری ترمیم کے بارے میں رپورٹ پیش کرنے کی ہدایت بھی کی۔ہائیکورٹ نے چینی کی قیمت کے بارے میں تمام درخواستوں کو اکٹھا کرکے سماعت ملتوی کر دی۔‎