اسلام آباد(این این آئی)نیشنل کمانڈ اینڈ آپریشن سینٹر (این سی او سی) کی جانب سے ملک کے بعض اضلاع میں 11 اپریل تک تعلیمی ادارے بند رکھنے کے اعلان کے بعد وفاقی وزیر تعلیم شفقت محمود ایک بار پھر سوشل میڈیا پر ٹرینڈ کرنے لگے۔سماجی رابطے کی ویب سائٹ ٹوئٹر پر شفقت محمود کے حوالے سے مختلف

اور دلچسپ میمز شیئر کیے جانے کا سلسلہ دن بھر جاری رہا،میمز میں جہاں پنجاب اور خیبر پختونخوا کے طالب علم تعلیمی ادارے بند کیے جانے کے بعد خوشی سے نہال ہورہے ہیں وہیں سندھ اور بلوچستان کے طالب علموں کو شفقت محمود سے ناراضگی کا اظہارکرتے دکھایا گیا ہے۔ایک صارف نے اداکارہ حرا مانی کی ڈرامے میں روتی ہوئی تصویر شئیر کرتے ہوئے لکھا کہ پاکستان کے ان دیگر اضلاع کے طالبعلم جو اسکول بند ہونے کا انتظار کررہے تھے، خاص کر سندھ کے طالبعلم۔ایک صارف نے بالی وڈ فلم پھر ہیرا پھیری کا ایک سین شیئر کرتے ہوئے کراچی سمیت دیگر اضلاع کو چھٹیاں نہ ملنے کے سبب محسوس کی جانے والی افسردگی کا اظہار کیا۔ایک صارف نے آصف زرداری کی وائرل میم پر شفقت محمود کا چہرہ پیسٹ کرتے ہوئے کیپشن دیا ایسی میٹنگ رکھتے ہی نہیں جس میں طلبہ کو چھٹیاں نہ دیں۔ایک صارف نے تو شفقت محمو د کی ویڈیو شیئر کرتے ہوئے یہ تک کہہ ڈالا کہ کنفرم جنتی ہے یہ۔سمیر نامی صارف کے مطابق ہر چیز عارضی ہے لیکن شفقت کی شفقت مستقل ہے۔نوشاد بلوچ نامی صارف نے دو قدم آگے بڑھ کر کمنٹ کیا اور ایک ٹیمپلیٹ شیئر کی جس پر لکھا تھا کہ تعلیمی ادارے ختم کرنے کا فیصلہ۔نوشاد نے کہا کہ طلبہ اس وقت اسی طرح کا فیصلہ چاہتے ہیں۔