اسلام آباد (آن لائن) وزیر اعلیٰ پنجاب کی معاون خصوصی ڈاکٹر فردوس عاشق اعوان نے مسلم لیگ نون کی نائب صدر مریم نواز کی خاموشی پر اْنہیں آڑے ہاتھوں لیتے ہوئے کہا ہے کہ جعلی راج کماری کا ٹوئٹر خاموش ہے۔ پاکستان تحریک انصاف کی سیاست نوٹ کی سیاست کو

دفن کردے گی۔ سینیٹ کا تقدس مجروح کرنے والے عناصر بے نقاب ہوں گے۔ میڈیا سے گفتگو کرتے ہوئے فردوس عاشق اعوان نے کہا کہ پاکستان تحریک انصاف کی سیاست نوٹ کی سیاست کو دفن کردے گی، پاکستان میں نوٹ کی نہیں ووٹ کی سیاست ہوگی۔فردوس عاشق اعوان نے کہا کہ وقت ثابت کرے گا کہ وہ اپنی رسوائی کا تاریخی بندوبست کررہے ہیں۔اْنہوں نے کہا کہ سینیٹ کا تقدس مجروح کرنے والے عناصر بے نقاب ہوں گے، ووٹ کو عزت دینے کا نعرہ لگاتے رہے اور جب وقت آیا تب پسپائی اختیار کی۔اْن کا کہنا تھا کہ ویڈیو کا منظر عام پر آنا پی ڈی ایم کو بے نقاب کرگیا جبکہ یوسف رضا گیلانی نے اپنی عزت کو بھی داؤ پر لگا دیا۔فردوس عاشق اعوان نے کہا کہ ایک سیٹ کے لیے پی پی نے جمہوریت کے قتل میں کوئی کسر نہیں چھوڑی، ویڈیو کے بعد معافی مانگی جاتی لیکن یہاں ڈھٹائی سے مقابلہ کیا جارہا ہے۔اْنہوں نے یہ بھی کہا کہ سینیٹ سے ایک ممبر مفرور ہے، عدالتوں کے اشتہاری ہیں، آج بھی ن لیگ اس ادارے کے قوانین اور روایات کو پامال کرنے کا باعث بنی. انہوں نے کہا کہ اسحاق ڈار کی اس ایوان میں آمد نہیں ہوئی، ن لیگ اپنے ذاتی مفادات کے لیے ہے، جو پاکستان کو استعمال کرتے رہے وہ اور ان کے رشتہ دار غیرحاضر ہیں۔فردوس عاشق نے کہا کہ پی ٹی آئی میں غلطی کی گنجائش نہیں ، بیٹا ٹھیک کہہ رہا ہے یا باپ اس کا فیصلہ میڈیا کرے گا۔