کراچی(یواین پی،مانیٹرنگ ڈیسک)پاکستان کرکٹ ٹیم کے سابق کپتان جاوید میانداد نے کہا ہے کہ بھارت کے خلاف سچائی بیان کرنے پر میرا ٹویٹر اکاؤنٹ بند کردیا گیا۔اپنے دور کے عظیم بیٹسمین جاوید میانداد نے میڈیا سے گفتگو کرتے ہوئے کہا کہ مجھے پتہ چلا ہے کہ ٹوئٹر نے میرا اکاؤنٹبند کر دیا،
لگتا ہے کہ ایسا بھارت کے خلاف سچائی بیان کرنے پر کیا گیا، میں اپنے ملک سے پیار کرتا ہوں، کوئی بھی پابندی مجھے سچ اور حق گوئی سے نہیں روک سکتی۔انہوں نے کہا کہ میں نے ہمیشہ سچ بیان کیا ہے اور آئندہ بھی حق اور سچائی پر ڈٹا رہوں گا، اگر سماجی رابطے کے ذریعہ ٹوئٹر نے میرا اکاؤنٹ بند کر دیا ہے تو اس سے مجھے کوئی فرق نہیں پڑتا۔دریں اثنا جاوید میانداد نے سیاست میں آنے کا اشارہ دے دیا ، انہوں نے کہا کہ حکومت اور سیاست دان جس طرح عوام کی پریشانیوں سے آنکھیں چرا رہے ہیں اس سے تو یہ لگتا ہے کہ مجھے عوام کو ان کا حق دلانے کے لیے خود سیاست میں آنا پڑے گا۔ ان سے جب سوال کیا گیا کہ آپ حکومت کی پالیسیوں پر تنقیدکرتے ہیں تو آپ خود ہی سیاست میں کیوں نہیں آ جاتے، جس کے جواب میں انہوں نے کہا کہ میرا کچھ پتہ نہیں کہ میں کب سیاست میں آجائوں۔ جاوید میانداد نے کہا کہ میں ایسا کر بھی سکتا ہوں، میرے نزدیک عوام کو ان کے حقوق کی فراہمی زیادہ ضروری ہے۔ باقی ممالک میں حکومتیں عوامی فلاح و بہبود کا خیال رکھتی ہیں لیکن یہاں ایسا کچھ دکھائی نہیں دیتا۔
