اسلام آباد (این این آئی)وزیراعظم عمران خان نے کہا ہے کہ موجودہ حکومت کسانوں کی خوشحالی اور زرعی شعبے کی ترقی کے لئے پر عزم ہے، عنقریب کسانوں کیلئے پاکستان کی تاریخ کے سب سے بڑے زرعی پیکیج کا اعلان کیا جائے گا ۔جمعہ کو وزیر اعظم عمران خان سے پاکستان تحریک انصاف کے سرگودھا سے تعلق رکھنے والے رہنمائوں کے وفد نے ملاقات کی ۔وفد میں اسامہ غیاث میلہ، انصر اقبال ہرل اور میجر جنرل (ر)سلیم میلہ شامل تھے۔وزیر اعظم کے معاون خصوصی ملک محمد عامر ڈوگر اور ڈپٹی اسپیکر قومی اسمبلی قاسم خان
سوری بھی ملاقات میں میں موجود تھے۔ملاقات میں پارٹی کے امور، عوام کو درپیش مسائل کے حل، فلاحی و ترقیاتی امور کے حوالے سے گفتگو کی گئی۔ وزیراعظم عمران خان نے کہا کہ موجودہ حکومت کسانوں کی خوشحالی اور زرعی شعبے کی ترقی کے لئے پر عزم ہے۔انہوں نے کہا کہ عنقریب کسانوں کے لئے پاکستان کی تاریخ کے سب سے بڑے زرعی پیکیج کا اعلان کیا جائے گا ۔ انہوں نے کہا کہ آج پاکستان میں گنے، چاول، سٹرس کے کاشتکاروں کو فصلوں کا زیادہ منافع مل رہا ہے جس سے دیہی علاقوں میں خوشحالی آ رہی ہے ۔
