فیصل آباد، کراچی (آن لائن ، مانیٹرنگ ڈیسک)نماز کیلئے نہ اٹھنے پر بیٹے نے سر میں اینٹ مار کر والد کو موت کے گھاٹ اتار دیا’آن لائن کے مطابق چشتیہ ٹائون’پل عبداللہ ‘سمندری روڈ کے علاقہ میں چشتیہ ٹائون گلی نمبر1کے رہائشی 50سالہ مبشر رضا ولد منظور کو اس کے بیٹے

شہبازنے نماز کیلئے نہ اٹھنے کا بہانہ بنا کر سر میں اینٹ مار دی جس سے مذکورہ شخص موقع پر ہی جاں بحق ہوگیا’پولیس نے موقع پر پہنچ کر نعش کو قبضے میں لے لیا اور ضروری کارروائی کے بعد ورثاء کے سپرد کردی’پولیس کے مطابق تحقیقات کے بعد اصل صورتحال سامنے آئیگی۔دریں اثنا صوبہ سندھ کے دارالحکومت کراچی کے علاقے منگھوپیر غازی گوٹھ کے رہائشی نے غیرت کے نام پر بہن اور رشتے دار کو قتل کر دیا۔اس حوالے سے ترجمان ضلع ملیر نے بتایا کہ مقتولین نے 2 روز قبل ہی ملیر سٹی کے علاقے میں رہائش اختیار کی تھی۔ترجمان پولیس کے مطابق گرفتار ملزم کی نشاندہی پر ملیر سٹی کے علاقے جوہرآباد سے مرد اور عورت کی 2 سے 3 روز پرانی لاشیں برآمد ہوئیں۔ملزم کے مطابق اس نے بکرا پیڑی سے قتل کی غرض سے چھری خریدی اور اپنی بہن کو ساتھی سمیت قتل کرنے کے بعد گھر کو باہر سے تالا لگا دیا تھا۔ترجمان کے مطابق جب ملزم کے والد کو بیٹی کے قتل کا علم ہوا تو انہوں نے پولیس کو اطلاع دی اور تھانہ منگھوپیر میں قتل کا مقدمہ درج کرایا،مقتولین کی شناخت 20 سالہ سمیرا اور 21 سالہ زاہد حسن کے ناموں سے ہوئی۔