لاہور( این این آئی )پاکستان ٹیکس ایڈوائزر ایسوسی ایشن نے حکومت کو انٹرنیشنل سیونگ سکیم متعارف کرانے کی تجویز دیتے ہوئے کہاہے اس اقدام کی کامیابی سے حکومت25ارب ڈالرتک کماسکتی ہے ، اس سکیم کے تحت بانڈزڈالرزکے عوض فروخت کئے جائیں تاہم انعامی رقم کو پاکستانی کرنسی میں فراہم کیا جائے ۔ان خیالات کا

اظہارمقررین نے پاکستانی معیشت کی بہتری کے حوالے سے منعقدہ مذاکرے میں خطاب کرتے ہوئے کیا ۔ اس موقع پر پاکستان ٹیکس بار ایڈوائزر ایسوسی ایشن کے چیئر مین جاوید اقبال قاضی، صدر میاں عبدالغفار ،جنرل سیکرٹری خواجہ ریاض حسین سمیت دیگر بھی موجود تھے۔خواجہ ریاض حسین نے کہا کہ ڈالر کی بڑھتی ہوئی قیمت مہنگائی کا سبب ہے جس کے لئے حکومت کو نیشنل سیونگ سکیم کے ساتھ انٹرنیشنل سیونگ اسکیم کااجراء کرنا چاہیے جو صرف غیر ملکیوں کیلئے مفید ہو ، اس کا طریق کار نیشنل سیونگ اسکیم کی طرح رکھا جائے۔انہوں نے کہا کہ 250ڈالر کے انعامی بانڈزپر انعام 5لاکھ ڈالر،500ڈالر پر 20لاکھ ڈالر اور ایک ہزار ڈالر پر 40لاکھ ڈالر انعام رکھا جائے، اس سیونگ سکیم میںنہ صرف اوور سیز پاکستانی بلکہ غیر ملکی سرکایہ کار بھی دلچسپی ظاہرکریں گیاور حکومت کامیابی کی صورت مین کم از کم 25ارب ڈالر کما سکتی ہے، شرط صرف یہ رکھی جائے کہ انعامی بانڈ ڈالر میں لیا جائے اور انعام پاکستانی کرنسی میں دیا جائے۔ اگر حکومت نیشنل سیونگ اسکیم سے 1300ارب سے زائد روپے اکٹھے کر سکتی ہے تو انٹرنیشنل سیونگ سکیم سے حکومت کی سوچ سے زیادہ اکٹھے ہو سکتے ہیں۔وزیر اعظم پاکستان عمران خان پر غیر ملکی اعتماد کا اظہار کرتے ہیں جس کا فائدہ اٹھاتے ہوئے غیر ملکی سرمایہ کاروں کیلئے بین الاقوامی بچت اسکیم کا اعلان کیا جائے،جہاں پاکستان میں ڈالر کی برسات ہو گی وہاں ایکسپورٹ بھی چار گناہ بڑھ جائے گی۔