لاہور(آن لائن،مانیٹرنگ ڈیسک )مسلم لیگ (ن)کے رہنما رانا ثنااللہ کا کہنا ہے کہ آپ کورونا سمیت جہاں مرضی چھپیں لیکن ہم بنی گالا میں چھپے کورونا کو بھگا کر دم لیں گے۔ہفتہ کے روز لاہور میں میڈیا سے گفتگو کرتے ہوئے رانا ثنااللہ نے کہا کہ میرے خلاف بیان دلوانے کیلئے کئی لوگوں

کو پکڑا گیا لیکن انہوں نے کہا رانا ثنا کے خلاف کوئی ثبوت نہیں ہیں، ان تمام لوگوں نے پوچھ گچھ میں میرے حق میں بات کی۔ لیگی رہنما کاکہنا تھا کہ ارشد ملک صاحب فوت ہو چکے، اب ان کے حوالے سے بات نہیں کرنی چاہیے، یہ لوگ ارشد ملک جیسے جج تیار کرتے ہیں، اسپیشل کورٹس سے کسی کو انصاف نہیں مل سکتا،یہ لوگ پوری دنیا میں میری ایک روپے مالیت کی جائیداد منظرعام پر نہیں لا سکے، میرا تو قومی اسمبلی کا اکانٹ تک منجمد کر دیا گیا ہے۔رانا ثنااللہ نے مزید کہا کہ 13 دسمبر کو انشا اللہ لاہور میں جلسہ ضرور ہوگا، آپ کورونا سمیت جہاں مرضی چھپیں،ہم آپ کو جیل میں بھیجیں گے اور تمام سہولیات دیں گے ،بیڈبھی دیں گے ،اے سی بھی دیں گے سوائے ایک چیز کے۔ان کا مزید کہنا تھا کہ پی ڈی ایم کے فیصلے پر اسمبلیوں سے استعفوں کے آپشن پرعمل کیا جائیگا۔انہوں نے کہا کہ یہ ایسا کورونا ہے جو جلسوں سے پہلے آتا ہے اور بعد میں بھاگ جاتا ہے، گوجرانوالہ اور ملتان کے جلسے ہوگئے تو کورونا وہاں سے بھاگ گیا ۔