نارنگ منڈی/لاہور(این این آئی ) نارنگ منڈی کے علاقہ کالاخطائی روڈ پر آلہ پور سیداں کے قریب شدید دھند کے باعث ٹیوٹا ویگن اور بس میں خوفناک تصادم کے بعد ویگن کا سلنڈر پھٹنے سے آتشزدگی کے نتیجے میں ایک ہی خاندان کے 13مرد و خواتین زندہ جل گئے۔

حادثے میں 17افراد شدید زخمی ہو گئے جنہیںتشویشناک حالت کے باعث مریدکے اور لاہور کے ہسپتالوں میں منتقل کر دیا گیا ،آتشزدگی کے باعث بس اور ویگن جل کر خاکستر ہو گئیں ، اطلاع ملنے پر ڈپٹی کمشنرشیخوپورہ ،ڈی پی شیخوپورہ اور ڈسٹرکٹ آفیسر ریسکیو موقع پر پہنچ گئے اور امدادی کارروائیوں کی نگرانی کی ۔بتایا جاتا ہے کہ بد قسمت ٹیوٹا ویگن میں ایک ہی خاندان کے 13افراد نواحی گائوں فتح ریان سے شادی کی تقریب کے بعد علی الصبح واپس اپنے گائوں کلہ مہاراں جا رہے تھے کہ نارنگ منڈی کے علاقہ آلہ پور سیداں کے قریب شدید دھند کے باعث نارووال سے لاہور جانے والی مسافر بس سے خوفناک تصادم کے باعث ویگن میں نصب گیس سلنڈر زور دار دھماکہ سے پھٹ گیا جس نے بس کو بھی اپنی لپیٹ میں لے لیا ،حادثے کے بعد بس کے مسافروں نے چھلانگیں لگا کر اپنی جانیں بچائیں جبکہ ویگن میں سوار مسافر زندہ جلتے رہے اور انہیں بچایا نہ جا سکا ۔اطلاع ملتے ہی ریسکیو ٹیمیں اورانتظامیہ کے اعلیٰ افسران موقع پر پہنچ

گئے اور امدادی سر گرمیوں کی نگرانی کی ۔ ہولناک آتشزدگی میں بس اورویگن مکمل طو رپر جل کر خاکستر ہو گئیں۔ریسکیو شیخوپورہ اور لاہور کی 11 گاڑیوں نے ریسکیو آپریشن میں حصہ لیا ۔ ترجمان ریسکیو کے مطابق 17 زخمی مسافروں کو فوری قریبی ہسپتال منتقل کیا گیا ۔

حادثے میں 13 افراد کی موت واقع ہوئی، 04 معمولی زخمیوں کو موقع پر فرسٹ ایڈ دی گی۔ ترجمان کے مطابق حادثے کے بعد گاڑیوں میں آگ لگ گئی ۔ ترجمان کے مطابق زخمیوں کو مقامی ہسپتال سے میوہسپتال لاہور شفٹ کیا گیا ،13 ڈیڈ باڈیز تحصیل ہیڈکوارٹر مریدکے شفٹ کردی گئی ہیں۔

زخمیوں میں خدیجہ ،نجمہ،اللہ بخش ،راحیلہ ،صدیق ،افضل ،مریم،فاطمہ،ہادیہ،منظور ،عظیم ،ریحانہ ،نواز ،ساحل ،حامد ،عابدہ اورسہیل شامل ہیں۔وزیراعلیٰ پنجاب سردار عثمان بزدارنے نارنگ منڈی کے قریب ہونے والے المناک حادثہ پر گہرے رنج و غم کا اظہار کرتے ہوئے حادثہ کی رپورٹ طلب کر لی ہے ۔ وزیر اعلیٰ پنجاب نے زخمیوں کوعلاج معالجے کی بہترین سہولیات فراہم کرنے کی ہدایت کی ہے ۔