اسلام آباد(نیوزڈیسک) وفاقی وزیر اطلاعات پرویز رشید نے ایم کیو ایم رابطہ کمیٹی کی وزیراعظم کے دورہ کراچی پر تنقید کو بلاجواز قرار دیا ہے۔ اپنے بیان میں انہوں نے کہا کہ وزیراعظم نوز شریف نے اپنے دورہ کراچی میں تمام طبقات سے ملاقات کی اور کراچی میں حالیہ شدید گرمی کے باعث ہونے والی اموات کے حوالے سے متعلقہ محکموں کو ہدایت کی کہ آئندہ ایسے واقعات سے نمٹنے کیلئے موثراحتیاطی تدابیر اختیار کی جائیں تاکہ مستقبل میں اس قسم کی صورتحال میں قیمتی انسانی جانوں کو بچایا جاسکے۔پرویز رشید نے کہا کہ وزیراعظم اس سے پہلے بھی کراچی سے متعلق ہر مسئلہ کے حل کیلئے ذاتی دلچسپی لیتے رہے ہیں اور اب تک ہونے والے بحران خواہ وہ دہشت گردی سے منسلک ہو یا انسانی جانوں کے ضیاع بارے ، وزیراعظم نے ہمیشہ ذاتی دلچسپی لے کر مسئلے حل کرنے کی کوشش کی ہے۔انہوں نے مزید کہا کہ کراچی کے منتخب نمائندے اپنا کردار اور ذمہ داریاں خوش اسلوبی سے نبھاتے تو اس طرح کے واقعات رونما ہی نہ ہوتے۔ وزیر اطلاعات نے کہا کہ بلا جواز تنقید کرنے کےبجائے کراچی کے منتخب نمائندوں کو وزیراعظم کی کاوشوں کو سراہنا چاہئیے اورعوام کودرپیش مسائل کو حل کرنے کیلئے حکومت کی بھرپور معاونت کرنی چاہئیے