اسلام آباد(مانیٹرنگ ڈیسک)جہلم کے ایک ٹیوشن سنٹرکے استاد کا کمسن بچیوں کیساتھ خوفناک سلوک ، ویڈیو وائرل ہونے پر پولیس نے واقعے کا نوٹس لیتے ہوئے ٹیچر کو حراست میں لے لیا ۔
نجی ٹی وی کے مطابق جہلم شہر کے محلہ خانساماں میں ٹیوشن سنٹرمیں استاد نے سبق یاد نہ کرنے پر کمسن بچیوں کیساتھ خوفناک سلوک کیا جس کی ویڈیو سوشل میڈیا پر وائرل ہوگئی ، وائرل ہونے والی ویڈیو میں دیکھا جاسکتا ہے کہ ٹیوشن ٹیچر کی طرف سے سبق یاد نہ کرنے پر کس طرح بے دردی کے ساتھ طالبات کو بالوں سے پکڑ کر کھینچا جا رہا ہے ۔ویڈیو کے وائرل ہوتے ہی ڈی ایس پی سٹی نے ٹیچر کو حراست میں لے لیا تاہم بچیوں کے والدین نے ڈی ایس پی دفتر میں پہنچ کراستاد کو معاف کردیا ۔ڈی ایس پی ابراہیم وڑائچ نے کہا کہ مدعی کے معاف کرنے کے باوجود پولیس کی مدعیت میں مقدمہ درج کیا جائے گا ، دریں اثنا وفاقی وزیر فیصل واوڈا نے بھی معاملے کا نوٹس لے لیااور کہا کہ یہ ظلم ہے ، جہلم پولیس کو واقعہ کی تفتیش کیلئے احکامات جاری کردئیے ہیں۔
