مردان(این این آئی) خیبر پختون خوا کے ضلع مردان کے علاقہ تخت بھائی میں کھدائی کے دوران برآمد ہونے والے گندھارا تہذیب کے مجسمے کو توڑ دیا گیا۔تخت بھائی کے علاقے میں تعمیراتی کام کے دوران مجسمہ برآمد ہوا تاہم جن مقامی شہریوں کو یہ مجسمہ ملا انہوں نے

اسے توڑ دیا، واقعہ کی وڈیو بھی سامنے آگئی ہے۔محکمہ آرکیالوجی نے معاملے کا نوٹس لیتے ہوئے ٹوٹے پھوٹے مجسمے کو تحویل میں لے کر  توڑنے والے افراد کو گرفتار کرلیا اور تحقیقات شروع کردی ہیں۔ڈائریکٹر آرکیالوجی ڈاکٹر عبدالصمد نے کہا کہ ماہرین کی رپورٹ آنے کے بعد معلوم ہوگا مجسمے کی تاریخی حیثیت کیا ہے۔تخت بھائی کو تخت بائی یا تخت بہائی بھی کہتے ہیں،یہ علاقہ بدھا تہذیب کی باقیات پر مشتمل مقام ہے جو اندازہً ایک صدی قبلِ مسیح سے تعلق رکھتا ہے جہاں سے بدھا تہذیب کی باقیات ملتی رہتی ہیں، اسی لیے اس مقام کو 1980 میں یونیسکو نے عالمی ثقافتی ورثہ قرار دیا تھا۔سری لنکا، کوریا اور جاپان سے بدھ مت کے پیروکار اس علاقے کا دورہ کرتے اور عبادت کرتے ہیں۔ ایک پہاڑی پر واقع ہونے کی وجہ سے اسے تخت کہتے ہیں اور ساتھ ہی دریا بہنے کی مناسب سے بہائی کہتے ہیں۔